Erjon Vishkulli, i riu nga Elbasani që mbeti i plagosur në sy gjatë protestës në Tiranë, ka reaguar publikisht pas ndërhyrjeve kirurgjikale në Shqipëri dhe në Itali. Përmes një mesazhi, ai ka falënderuar familjarët, miqtë dhe shqiptarët kudo në botë që i kanë qëndruar pranë gjatë kësaj periudhe të vështirë.
Vishkulli shkruan se mesazhet, telefonatat dhe lutjet e njerëzve i kanë dhënë forcë dhe shpresë për të përballuar sfidën me shikimin. Ai shprehet se solidariteti i treguar e ka bërë të ndihet i mbështetur dhe jo i vetëm në këto momente.
“Çdo fjalë e juaja më ka dhënë forcë, shpresë dhe kurajë për të vazhduar përpara”, shkruan ai, ndërsa falënderon veçanërisht Zotin për forcën, jetën dhe shpresën.
Në reagimin e tij, i riu shpreh gjithashtu dëshirën që kjo sfidë të kalojë me sukses dhe u uron shëndet e bekime të gjithë atyre që i kanë qëndruar pranë.
Erjon Vishkulli u plagos gjatë protestës në Tiranë dhe u transportua drejt Spitalit të Traumës me automjetin e Report Tv. Atje iu nënshtrua një ndërhyrjeje urgjente, ndërsa më pas kreu një tjetër operacion në klinikën “Gemelli” në Romë, i cili rezultoi i suksesshëm.