Rreth 450 demokratë nga Vlora, Himara dhe Saranda janë nisur drejt kryeqytetit për të marrë pjesë në protestën e Partisë Demokratike që zhvillohet sot në Tiranë në mbështetje të studentëve.
A2CNN raporton se vetëm nga dega e PD-së në Vlorë janë nisur rreth 300 simpatizantë, rreth 50 më pak se në protestën e fundjavës së kaluar, kur nga ky qytet udhëtuan drejt Tiranës rreth 350 persona.
Organizimi është bërë si në protestat e mëparshme. Makinat janë regjistruar paraprakisht në degën e partisë nga administratorët e tyre, ndërsa nisja është kryer me automjete private, në 07:00-08:30. Për demokratët që nuk disponojnë automjete personale, janë siguruar vende në makinat e simpatizantëve të tjerë.
Nuk ka pasur organizim me autobusë apo furgonë.
Në mbështetje të studentëve, krahas anëtarëve dhe simpatizantëve të PD-së, drejt Tiranës janë nisur edhe qytetarë që synojnë të mbështesin kauzën e studentëve.
