Një tubacion i ujit të pijshëm ka pësuar defekt në lagjen “Qemal Stafa” në Elbasan, duke lënë prej disa ditësh banorët përballë rrjedhjes së ujit dhe mungesës së ndërhyrjes nga strukturat përgjegjëse.
Sipas BW, pavarësisht ankesave të banorëve të depozituara pranë Shoqërisë Rajonale Ujësjellës-Kanalizime Elbasan, deri më tani nuk është marrë asnjë masë për riparimin e defektit.
Situata ngre pikëpyetje për cilësinë dhe mirëmbajtjen e rrjetit, veçanërisht pas investimit prej 13.8 milionë eurosh, financuar nga Banka Gjermane për Zhvillim KfW dhe qeveria shqiptare. Projekti parashikonte rehabilitimin e rrjetit kryesor, sekondar dhe terciar, me synimin për të garantuar furnizim 24 orë me ujë të pijshëm.
Ndërkohë, Ministria e Infrastrukturës dhe Energjisë njoftoi në maj 2026 se rreth 60% e popullsisë së qytetit përfitonte furnizim të pandërprerë me ujë.
Edhe pse janë raportuar investime të konsiderueshme, problematikat në rrjet vijojnë. Në tetor 2026 është publikuar gjithashtu një procedurë e re prokurimi për rehabilitimin e ujësjellësit të Elbasanit, me fond limit rreth 647.5 milionë lekë.
Banorët e “Qemal Stafës” kërkojnë ndërhyrje të menjëhershme për riparimin e tubacionit dhe marrjen e masave për të parandaluar përsëritjen e rasteve të tilla.
