Kryeministri i Kosovës, Albin Kurti, ka kërkuar që aktgjykimi ndaj Hashim Thaçit, Kadri Veselit, Jakup Krasniqit dhe Rexhep Selimit të ndryshohet në shkallën e Apelit, duke e cilësuar atë të padrejtë dhe të pasaktë.
Duke folur në mbledhjen e Këshillit të Përgjithshëm të Lëvizjes Vetëvendosje, Kurti u ndal edhe te procesi zgjedhor, për të cilin tha se mbajtja e zgjedhjeve ishte dëshmuar e kotë.
Megjithatë, sipas tij, në rrethanat e krijuara pas aktgjykimit ndaj katër ish-krerëve të Ushtrisë Çlirimtare të Kosovës, shmangia e zgjedhjeve ishte edhe më e rëndësishme.
“Shkuarja në zgjedhje u dëshmua të jetë e kotë, por mosshkuarja në to kësaj radhe ishte edhe më e rëndësishme për kontekstin që u prodhua pas aktgjykimit për katër krerët e UÇK-së, Hashim Thaçin, Jakup Krasniqin, Kadri Veselin dhe Rexhep Selimin”, deklaroi Kurti.
Kreu i Qeverisë e vlerësoi aktgjykimin si të padrejtë në aspektin juridik dhe moral, ndërsa tha se ai nuk qëndron as në aspektin historik dhe faktik.
“Aktgjykim i padrejtë juridikisht dhe moralisht, si dhe i pasaktë historikisht dhe faktikisht. Ky aktgjykim duhet ndryshuar dhe korrigjuar në shkallën e Apelit dhe atë sa më parë”, u shpreh Kurti. /Telegrafi/
