Protesta e 19-të u zhvillua e ndarë në dy fronte: studentët para Ministrisë së Arsimit dhe një grup i thirrur nga Partia Demokratike para Kryeministrisë. Deputetët e PD-së Flamur Noka, Agron Gjekmarkaj, Gazment Bardhi, Bledion Nallbati e të tjerë marshuan drejt Kryeministrisë dhe qëndruan aty rreth 30 minuta, para se të nisnin drejt Ministrisë së Arsimit, ku ndodheshin studentët. Kryetari i PD, Sali Berisha, kishte ftuar anëtarët dhe mbështetësit të mbërrinin në orën 12:00, por vetë nuk mori pjesë në marshim.
Kur grupi i opozitës arriti në hyrje të Rrugës së Durrësit u dëgjuan thirrje si “Rama në burg, Berisha në burg” dhe u regjistrua edhe një përplasje verbale me një protestues që kërkonte largimin e deputetëve. Nga grupimi demokrat u dëgjuan gjithashtu thirrje “Poshtë komunizmi”. Pas tensioneve të para, studentët dhe protestuesit e PD-së mbetën në zonën e Rrugës së Durrësit.
Para Ministrisë së Arsimit situata u tensionua më tej. Për rreth një orë Policia e Shtetit bëri thirrje që të ndalohej hedhja e gurëve dhe sendeve të forta ndaj efektivëve, duke njoftuar se grupi që po godiste ishte i maskuar dhe persona të identifikuar do të përballeshin me ligjin. Protestuesve të tjerë u kërkua të distancoheshin. Pavarësisht paralajmërimeve, disa protestues vazhduan të heqin pllaka guri nga trotuaret dhe t’i hodhin drejt forcave të policisë. Policia deklaroi se bëri paralajmërimin e fundit dhe përsëriti thirrjen për të mos qëlluar ndaj efektivëve.
Para ministrisë u krijua një re tymi; fillimisht u raportua se shkak ishin flakadanët, por më pas u sqarua se tymi vinte nga zjarri i fikur në kazanët e mbeturinave, që mbështolli zonën. Protestuesit vazhduan me thirrje si “Ju erdhi fundi”. Policia kujtoi hyrjen në fuqi të aktit normativ që ndalon mbajtjen e maskave dhe goditjen ndaj forcave të rendit. Deri në një fazë të protestës forcat ishin rezervuar dhe nuk kishin ndërhyrë fizikisht; në një moment u përdor autoboti dhe ujë si masë parandaluese. Rreth orës 15:20 protestuesit nisën të hedhin një “breshëri” molotovësh drejt policisë, e cila iu përgjigj me ujë dhe gaz lotsjellës.