Atletico Madrid merr në heshtje vendin e parë, vjen fitorja e 7 radhazi në ‘La Liga’
Ndërsa vëmendja është përqendruar te rivaliteti mes Barcelonës dhe Real Madridit, Atletico Madrid po ndërton në heshtje një ecuri mbresëlënëse, duke u shndërruar në një pretendente serioze për kreun e La Ligës.
Skuadra e Diego Simeones ka regjistruar fitoren e shtatë radhazi në kampionat, duke mposhtur Levanten me rezultatin 2-0 në transfertë. Një sukses ky që i ka dhënë mundësinë madrilenëve të ngjiten përkohësisht në vendin e parë të renditjes.
Atletico e zgjidhi sfidën me nga një gol në secilën pjesë. Grimaldo zhbllokoi rezultatin në fraksionin e parë, ndërsa Giuliano Simeone vulosi fitoren në pjesën e dytë, duke i dhënë skuadrës tri pikë të rëndësishme.
Me këtë triumf, Atletico Madrid shkon në kuotën e 28 pikëve, duke kaluar përkohësisht Barcelonën në klasifikim. Bilanci i skuadrës së Simeones deri në këtë pikë të sezonit është 9 fitore, 1 barazim dhe 1 humbje.
Në një kampionat ku Barcelona dhe Real Madrid kanë marrë pjesën më të madhe të vëmendjes, Atletico po flet me rezultate në fushë. Ecuria e fundit konfirmon se skuadra e Simeones synon të jetë një faktor i rëndësishëm në garën për titullin kampion.
