Pedro Acosta është fituesi i garës Sprint të MotoGP-së në Malajzi.
Piloti spanjoll i KTM-së siguroi fitoren pas një gare të luftuar, duke kaluar në krye vetëm tre xhiro para përfundimit dhe duke e mbyllur garën përpara Marc Marquez dhe Marco Bezzecchi.
Gara nisi me Alex Marquez në krye, i ndjekur nga Acosta, Ai Ogura dhe Marc Marquez. Piloti i skuadrës Gresini e mbajti vendin e parë në xhirot e para, por një rrëzim në xhiron e dytë ndryshoi rrjedhën e garës.
Pas këtij momenti, Ai Ogura mori drejtimin dhe për një pjesë të madhe të garës arriti të mbante pas Acostan dhe Marc Marquez. Megjithatë, shfaqja e shiut në pistë solli ndryshime të rëndësishme në renditje, duke vështirësuar kushtet për pilotët. Disa prej tyre, mes të cilëve Joan Mir, Iker Lecuona dhe Franco Morbidelli, u futën në bokse për të ndërruar gomat.
Në këto kushte, Acosta përfitoi dhe tre xhiro para fundit parakaloi Oguran, duke marrë kryesimin që nuk e lëshoi më deri në flamurin me kuadrate.
Piloti japonez nuk arriti ta ruante pozicionin në xhirot e fundit, pasi u parakalua edhe nga Marc Marquez dhe Marco Bezzecchi, duke e mbyllur garën në vendin e katërt. Pas tyre u renditën dy pilotët e Ducati-t, Fabio Di Giannantonio dhe Francesco Bagnaia.
Për Pedro Acostan kjo është fitorja e dytë në garat Sprint gjatë këtij sezoni. Ndërkohë, Marc Marquez vazhdon të ruajë një avantazh prej 19 pikësh ndaj Jorge Martin në renditje.
Ky i fundit nuk mori pjesë në Sprintin e Malajzisë, pasi vendosi të tërhiqej nga fundjava garuese për të vijuar rikuperimin fizik, me synimin për t’u rikthyer në garën e Katarit.
