Franca ka vendosur në gatishmëri 70 mijë efektivë policie për protestat e paralajmëruara këtë të shtunë, në një përpjekje për të parandaluar përsëritjen e trazirave dhe akteve të dhunës që përfshinë disa qytete të vendit gjatë javëve të fundit.
Demonstratat, të cilat përkojnë me festën e Halloween-it, organizohen nga studentë, sindikata dhe mbështetës të lëvizjes së Jelekëve të Verdhë.
Protestuesit kundërshtojnë rritjen e kostos së jetesës, shtrenjtimin e karburanteve dhe përkeqësimin e shërbimeve publike.
Autoritetet franceze kanë paralajmëruar për një rrezik shumë të lartë të përshkallëzimit të situatës, veçanërisht gjatë orëve të mbrëmjes. Shqetësimi kryesor lidhet edhe me mundësinë që disa protestues të përdorin maskat e Halloween-it për të fshehur identitetin dhe për t’iu shmangur identifikimit nga policia.
Ministri i Brendshëm, Laurent Nuñez, ka paralajmëruar reagim të ashpër ndaj çdo akti të dhunshëm, duke theksuar se të gjitha strukturat e sigurisë janë angazhuar për të garantuar rendin publik.
Ndërkohë, autoritetet kanë vendosur kufizime edhe për itinerarin e protestës kryesore në Paris. Gjykata më e lartë në Francë rrëzoi vendimin e një gjykate më të ulët që lejonte marshimin nga Bastille drejt Place de la Nation. Në vend të kësaj, demonstruesit do të lejohen të marshojnë në një itinerar alternativ, nga Porte de Bagnolet drejt Porte de Charenton, në periferi të kryeqytetit.
Protestat kanë nisur të marrin përmasa më të mëdha që prej muajit shtator, fillimisht për shkak të problemeve në sistemin arsimor, si infrastruktura e dobët e shkollave, klasat e mbipopulluara dhe shqetësimet për sistemin e pranimit në universitete. Më pas, lëvizjes iu bashkuan sindikatat dhe përfaqësues të Jelekëve të Verdhë, duke zgjeruar kërkesat edhe për çështjet ekonomike.
Masat e sigurisë janë përforcuar pas trazirave të dy javëve më parë, kur dyqane, biznese dhe ndërtesa publike u dëmtuan në disa qytete franceze. Në Paris, autoritetet kanë vendosur gjithashtu kufizime gjatë natës së së shtunës dhe së dielës në disa zona ku u regjistruan përplasje të rënda më 17 tetor.
Situata ka shtuar presionin edhe mbi qeverinë e pakicës së presidentit Emmanuel Macron, e cila po përgatit buxhetin për vitin 2027, në një kohë kur borxhi publik po i afrohet 120% të Prodhimit të Brendshëm Bruto.
Protestat në Francë pritet të shoqërohen me tubime edhe në vende të tjera evropiane. Sipas raportimeve të Reuters, më shumë se 30 qytete në Gjermani pritet të përfshihen nga demonstratat këtë të shtunë.
