Eksportet shqiptare të mallrave regjistruan një rritje të fortë në terma realë gjatë tremujorit të dytë të vitit 2026, të mbështetura kryesisht nga produktet energjetike dhe metalet. Sipas raportit të fundit ekonomik të Komisionit Evropian, eksportet reale të mallrave u rritën me 36,5% në krahasim me të njëjtën periudhë të vitit të kaluar.
Komisioni Evropian e lidh këtë zhvillim kryesisht me ecurinë e eksporteve të energjisë dhe metaleve, të ndihmuara nga kushtet e favorshme për prodhimin e energjisë hidroelektrike dhe nga efekti i bazës krahasuese.
Kjo do të thotë se ritmi i lartë i rritjes duhet parë edhe në raport me nivelin e eksporteve në të njëjtën periudhë të vitit të kaluar, ndërsa prodhimi hidroenergjetik mbetet i ndikuar nga kushtet hidrike.
Ndryshe nga mallrat, eksportet e shërbimeve shënuan një rritje më të moderuar, prej 3,8%. Si rezultat, eksportet totale të mallrave dhe shërbimeve u rritën me 9,8% në terma realë gjatë tremujorit të dytë, duke ruajtur të njëjtin ritëm si në tremujorin e parë.
Nga ana tjetër, importet totale u rritën me 7,6%, të nxitura nga kërkesa e brendshme dhe shtimi i importeve të karburanteve.
Sipas raportit, importet e mallrave u zgjeruan me 10,2%, ndërsa ato të shërbimeve me 2,4% Duke qenë se eksportet totale u rritën më shpejt se importet, tregtia e jashtme neto dha një kontribut të vogël pozitiv në rritjen ekonomike të vendit.
Turizmi zgjeron suficitin e shërbimeve
Të dhënat tregojnë se përmirësimi i eksporteve është shoqëruar edhe me një forcim të pozicionit të jashtëm të ekonomisë shqiptare.
Sipas Komisionit Evropian, bilanci i llogarisë korrente kaloi në një suficit prej 0,2% të Prodhimit të Brendshëm Bruto, i llogaritur për katër tremujorët deri në qershor 2026. Një vit më parë, ky bilanc ishte në deficit prej 2,4% të PBB-së.
Ndërkohë, suficiti i tregtisë së shërbimeve u zgjerua me 1 pikë përqindjeje, duke arritur në 16,6% të PBB-së, kryesisht falë të ardhurave nga turizmi.
Megjithatë, tregtia e mallrave mbetet në deficit të konsiderueshëm. Deficiti tregtar i mallrave ishte sa 21,6% e PBB-së, ndonëse u ngushtua me 0,2 pikë përqindjeje krahasuar me një vit më parë.
Këta tregues nxjerrin në pah rolin e ndryshëm që kanë mallrat dhe shërbimet në ekonominë e jashtme të Shqipërisë. Ndërsa energjia dhe metalet i dhanë shtysë rritjes reale të eksporteve të mallrave në tremujorin e dytë, turizmi vijon të jetë një faktor kryesor në kompensimin e deficitit të tregtisë së mallrave.
Raporti i Komisionit Evropian vlerëson gjithashtu se përmirësimi i bilancit të jashtëm u mbështet nga një ecuri më e mirë e të ardhurave parësore, pjesërisht falë të ardhurave më të larta nga puna afatshkurtër dhe ndërkufitare jashtë vendit./ekofin.al
