Kryetari i Bashkisë së Lezhës, Pjerin Ndreu, ka konfirmuar se do të rikandidojë për një mandat të tretë në zgjedhjet vendore të 9 majit 2027.
Përmes një postimi në rrjetet sociale, Ndreu ka argumentuar vendimin e tij duke bërë një bilanc të punës gjatë dy mandateve në drejtimin e bashkisë. Sipas tij, rikandidimi lidhet me nevojën për të përfunduar projektet e nisura dhe për të vijuar investimet në qytet dhe në zonat rurale.
Ndreu deklaron se në vitin 2019 mori drejtimin e një bashkie me 4.6 milionë euro borxhe, rreth 1200 punonjës dhe një buxhet prej 12.7 milionë eurosh. Ai kujton gjithashtu se mandati i parë u shoqërua me vështirësi të mëdha, si tërmeti, pandemia dhe pasojat ekonomike të luftës në Ukrainë.
Sipas shifrave të publikuara prej tij, buxheti i Bashkisë Lezhë për vitin 2027 parashikohet të arrijë në 33–34 milionë euro, ndërsa borxhet janë shlyer. Ndreu pretendon se 65% e buxhetit tashmë sigurohet nga të ardhurat e bashkisë dhe 59% e tij shkon për investime.
Ai rendit ndër arritjet kryesore ndërhyrjet në mbi 250 kilometra rrugë rurale, përmirësimin e menaxhimit të mbetjeve, si dhe investimet në turizëm, sport, kulturë, ujësjellës, kanalizime dhe sistemet e ujitjes e kullimit.
Megjithatë, Ndreu pranon se ka ende projekte të papërfunduara dhe problematika që kërkojnë zgjidhje, duke e paraqitur mandatin e tretë si vazhdimësi të punëve të nisura.
Kryebashkiaku thekson se administrata do të vijojë t’u shërbejë të gjithë qytetarëve, pavarësisht bindjeve politike.
Në fund, Ndreu përcjell edhe një mesazh ironik për kundërshtarët e tij: “Ata që nuk na duan, do të duhet të na durojnë edhe katër vite të tjera… duke punuar!”, ndërsa shton se më 9 maj vendimin përfundimtar do ta japin qytetarët.