Një 26-vjeçar shqiptar, i identifikuar si Romarjo Tahiri, është arrestuar në Greqi, gjashtë vite pas vrasjes së Spartak Dervishit në Selanik.
I riu ishte shpallur në kërkim ndërkombëtar nga Interpol Tirana, pasi dyshohet se në vitin 2020, në bashkëpunim me dy persona të tjerë, ka dhunuar dhe më pas ka goditur me mjete prerëse Dervishin, duke i shkaktuar vdekjen.
Sipas njoftimit të policisë, Gjykata e Korçës i kishte caktuar Tahirit në vitin 2021 masën e sigurisë ‘Arrest në burg’ për veprën penale ‘Vrasja me dashje’, kryer në bashkëpunim.
“U arrestua provizorisht në Greqi, me qëllim ekstradimin në Shqipëri, shtetasi i shpallur në kërkim ndërkombëtar, R. T., 26 vjeç, i lindur në Korçë.
Në vitin 2021, Gjykata e Korçës i ka caktuar këtij shtetasi masën e sigurisë “Arrest në burg”, për veprën penale “Vrasja me dashje”, kryer në bashkëpunim. Nga hetimet dyshohet se në vitin 2020, në Selanik, shtetasi R. T., në bashkëpunim me 2 shtetas të tjerë, kanë vrarë shtetasin shqiptar S. D., të cilin fillimisht e kanë dhunuar dhe më pas e kanë goditur me mjete prerëse.
Familjarët e viktimës kanë bërë kallëzim në Korçë për ngjarjen e ndodhur në Selanik dhe veprimet janë koordinuar me autoritetet greke”,- thuhet në njoftimin e Policisë.
Interpol Tirana vijon bashkëpunimin me Interpol Athinën për të finalizuar procedurën për ekstradimin e 26-vjeçarit në Shqipëri.
