Binance, platforma më e madhe në botë për shkëmbimin e kriptomonedhave, deklaron se ka mbuluar 90% të aseteve me vlerë 6.3 miliardë dollarë (4.7 miliardë paund), të vjedhura gjatë një sulmi kibernetik të enjten.
Pjesa e mbetur prej 10% mund të kërkojë më shumë kohë për t’u siguruar në sasitë e nevojshme, shtoi kompania, shkruan BBC.
Binance ka premtuar vazhdimisht se do të mbulojë 100% të humbjeve nga ajo që dyshohet të jetë vjedhja më e madhe e kriptomonedhave e regjistruar ndonjëherë. Kompania tha se ka vënë në dispozicion më shumë se 6.34 miliardë dollarë nga fondet e saj për ta realizuar këtë.
«Binance do të përballojë ndikimin financiar të këtyre fondeve të vjedhura, jo përdoruesit tanë», thuhet në një deklaratë të kompanisë të publikuar të shtunën.
Në një përditësim të publikuar të dielën, Binance tha se tërheqjet ishin rikthyer në disa prej rrjeteve të saj, pasi ishin pezulluar pas sulmit kibernetik.
Më herët, kompania kishte deklaruar se tërheqjet do të riktheheshin në disa faza. Byroja Federale e Hetimit (FBI) deklaroi të shtunën se përgjegjës për sulmin ishte Koreja e Veriut.
FBI tha se kishte vërejtur se hakerat po i konvertonin asetet e vjedhura në një lloj kriptomonedhe të quajtur Ethereum dhe se pritet që këto asete të konvertohen më pas sërish përmes shërbimeve të financave të decentralizuara dhe platformave të këmbimit të menjëhershëm.
Dy kompani analitike i thanë më herët BBC-së se kishin informacione të besueshme që tregonin se autorët e mundshëm ishin anëtarë të grupit Lazarus, një njësi hakerash e mbështetur nga shteti i Koresë së Veriut, e njohur gjithashtu si TraderTraitor. Ky grup u përmend konkretisht edhe nga FBI.
Duke folur për gazetarët të shtunën në mbrëmje, presidenti amerikan Donald Trump tha se SHBA-ja ende nuk e di me siguri se kush qëndron pas sulmit.
«Po mësojmë për këtë çështje. Nuk e dimë nëse është Koreja e Veriut, por nëse është, do të flasim me Korenë e Veriut për këtë», tha ai.
Binance deklaroi se i kishte zëvendësuar asetet e vjedhura duke përdorur fonde të ndryshme dhe rezervat e veta financiare të kompanisë.
Kompania tha se mbulimi përfshin të gjitha asetet e mbajtura në kriptomonedhat Bitcoin, Ethereum dhe Tether, si dhe shtatë asete të tjera kripto që tregtohen gjerësisht.
Nga Bitcoin te Binance: Termat e kriptomonedhave dhe kuptimi i tyre
Sulmi kibernetik besohet të jetë më i madhi në histori, duke tejkaluar rekordin e vjedhjes së 1.5 miliardë dollarëve nga platforma Bybit në vitin 2025, për të cilën FBI deklaroi gjithashtu se përgjegjëse ishte Koreja e Veriut.
Koreja e Veriut e ka mohuar gjithmonë përfshirjen në këto sulme.
Hetimi fillestar i Binance sugjeroi se ishte komprometuar laptopi i një inxhinieri, gjë që u kishte mundësuar personave të paautorizuar të kryenin tërheqje. Megjithatë, në një përditësim të mëvonshëm, kompania tha se kishte zbuluar «pika të tjera të cenimit të sigurisë».
Richard Teng, bashkëdrejtori ekzekutiv i Binance, tha se sulmi ishte kryer nga më shumë se një person dhe se hakerat kishin përdorur metoda të sofistikuara për të fshehur gjurmët, siç ishte një «mekanizëm vetëshkatërrimi».
Të premten, kompania deklaroi se kishte ngrirë rreth 3 miliardë dollarë në asete të vjedhura, pas bashkëpunimit me agjencitë ligjzbatuese, kompanitë e inteligjencës dhe partnerët e saj.
Hetimi është ende në vijim, shtoi kompania. Shërbimi Sekret i SHBA-së deklaroi të premten se po punonte «pa ndërprerje» me partnerët e sektorit privat «për të identifikuar, ngrirë, gjurmuar dhe rikuperuar fondet» e vjedhura nga Binance.
Binance, e themeluar në Kinë në vitin 2017, u mundëson përdoruesve të blejnë, shesin dhe tregtojnë asete dixhitale. Vlerësohet se platforma ka qindra miliona përdorues në mbarë botën.
Kriptomonedhat janë asete dixhitale që nuk ekzistojnë fizikisht dhe që aksesohen përmes kuletave dixhitale ose kompjuterëve.
