Një pajisje e vogël ndezëse shpërtheu herët të dielën jashtë hyrjes së një pallati banimi në qendër të Athinës, ku ndodhet zyra politike e ministrit të Migracionit të Greqisë, Thanos Plevris. Shpërthimi shkaktoi dëme të vogla materiale, por nuk pati persona të lënduar.
Në një postim në rrjetet sociale, Plevris ia atribuoi sulmin «mbështetësve të emigrantëve të paligjshëm», të cilët, sipas tij, kishin vënë në shënjestër zyrën e tij. Deri në atë moment, askush nuk kishte marrë përgjegjësinë për sulmin, shkruan Ekathimerini.
Plevris pretendoi se mënyra se si ishte vendosur pajisja – e përbërë nga bombola të vogla gazi për kamping, të lëna në hyrjen e ndërtesës në nivelin e rrugës, në zonën Kolonaki – dëshmonte për «qëllim vrasjeje». Shpërthimi ndodhi pak pas orës 02:00 të mëngjesit, duke thyer xhamat e derës së ndërtesës.
Në postimin e tij në rrjetet sociale, Plevris i cilësoi autorët e panjohur si «llum» dhe shtoi: «Unë i frikësoj ata, ata nuk më frikësojnë mua».
Partia qeverisëse Demokracia e Re e dënoi sulmin me zjarrvënie të së dielës si një «akt fashist» dhe u bëri thirrje partive opozitare t’i bashkohen dënimit të incidentit.
Qeveria konservatore e Greqisë ka mbajtur një qëndrim të ashpër ndaj emigrantëve pa dokumente dhe është në negociata me katër vende të tjera anëtare të Bashkimit Evropian për hapjen e qendrave të deportimit jashtë territorit të bllokut prej 27 shtetesh, për personat të cilëve u janë refuzuar kërkesat për azil.
Organizatat për të drejtat e njeriut e kanë kundërshtuar ashpër këtë ide.
