Pesë adoleshentë, të moshave 16 dhe 17 vjeç, u plagosën rëndë pas një sulmi me thikë gjatë një feste Halloween në Chandler’s Ford, pranë qytetit Eastleigh, në jug të Anglisë. Policia britanike po zhvillon hetime për të identifikuar autorët, ndërsa të plagosurit janë dërguar në spital për trajtim mjekësor.
Ngjarja ndodhi të shtunën, pak pas orës 22:30, në Park Road, ku sipas raportimeve një grup personash të paidentifikuar dyshohet se ka hyrë në ambientet ku po mbahej festa dhe më pas janë kryer sulmet me thikë. Në mesin e të plagosurve policia e Hampshire ka saktësuar se janë tre djem 16-vjeçarë dhe dy adoleshentë 17-vjeçarë. Të gjithë janë transportuar menjëherë në spital për të marrë ndihmën e nevojshme.
Dëshmitarë okularë thanë për BBC-në se në vendngjarje mbërritën disa ambulanca. Një dëshmitar tregoi se pa një person duke u larguar me vrap nga banesa, i cili pohoi se ishte goditur me thikë dhe se po ndiqej nga dy persona. Policia ka vendosur një kordon sigurie për të siguruar zonën ndërsa vijojnë hetimet për zbardhjen e plotë të rrethanave të incidentit.
Inspektorja detektive Elizabeth Pirie, e cila po udhëheq hetimet, shprehu mirëkuptim për shqetësimin e banorëve të zonës dhe falenderoi komunitetin për bashkëpunimin dhe durimin ndërsa autoritetet punojnë për të sqaruar të gjitha aspektet e ngjarjes. Policia ka bërë thirrje që dëshmitarët dhe çdo person me informacion relevant të kontaktojnë autoritetet për të ndihmuar në identifikimin e autorëve dhe në avancimin e hetimeve.
Deputetja e Eastleigh, Liz Jarvis, shprehu solidaritetin me viktimat dhe familjet e tyre dhe falenderoi policinë dhe shërbimet e emergjencës për reagimin e shpejtë. Ajo gjithashtu u bëri thirrje qytetarëve të shmangin spekulimet dhe shpërndarjen e informacioneve të pakonfirmuara lidhur me incidentin, duke theksuar rëndësinë e mbajtjes së qetësisë dhe besimit në procesin hetimor.