Detaje të reja janë bërë të ditura lidhur me ngjarjen e rëndë në fshatin Demiraj të Gjilanit, ku mëngjesin e së dielës u gjetën pa shenja jete një 27-vjeçar dhe një foshnjë.
Policia e Kosovës ka njoftuar se në lidhje me rastin është arrestuar një 65-vjeçar, babai i 27-vjeçarit, i cili dyshohet për përfshirje në ngjarje.
Sipas njoftimit zyrtar, dy trupat e pajetë u zbuluan pas një informacioni të pranuar rreth orës 08:47 të datës 1 nëntor. Në vendngjarje mbërritën njësitet policore, Prokurori i Shtetit dhe ekipi emergjent mjekësor, i cili konstatoi vdekjen e të dy personave.
Nga hetimet fillestare, Policia dyshon se ngjarja ka ndodhur brenda familjes.
I dyshuari 65-vjeçar është arrestuar dhe, me vendim të prokurorit, është ndaluar për 48 orë.
Ndërkohë, me urdhër të Prokurorit të Shtetit, trupat e pajetë janë dërguar në Institutin e Mjekësisë Ligjore (IML) në Prishtinë, ku do t’u nënshtrohen obduksionit.
Rasti është cilësuar si “Vrasje e Rëndë”, ndërsa hetimet po vijojnë në koordinim mes Policisë së Kosovës dhe Prokurorisë, me qëllim zbardhjen e plotë të rrethanave të ngjarjes.