Mungesa e ujit dhe infrastruktura po kthehet në problem serioz për banorët e fshatit Fushë Buall në Elbasan. Ata thonë se shteti i ka harruar, ndërsa tregojnë se një ndër shqetësimet kryesore mbetet mungesa e shërbimit shëndetësor.
Fshati Fushë-Buall në Bashkinë Elbasan, prej kohësh është lënë në harresë nga institucionet vendore. Problemi më i madh për banorët vijon të mbetet rruga dhe mungesa e ujit të pijshëm, pasi kjo zonë nuk ka njohur kurrë investime.
Rruga që e lidh këtë zonë me pjesën tjetër të vendit është krejtësisht e paasfaltuar në një gjatësi rreth 5 km dhe gjatë dimrit bëhet totalisht e pakalueshme.
Në rastet e emergjencave shëndetësore, këta banorë detyrohen që të sëmurët t’i transportojnë në mënyrë primitive deri në qendër të fshatit, pasi autoambulanca nuk mund të hyjë në zone.
Kjo situatë e pandryshuar prej vitesh tashmë ka bërë që të gjithë të rinjtë të largohen dhe në zonë të mbeten vetëm të moshuarit, pasi sipas tyre nuk mund të mbijetosh në këto kushte skandaloze.
