Gjykata e Tiranës ka vendosur lirimin e një protestuesi të arrestuar më 29 tetor gjatë protestave në kryeqytet, duke i caktuar dy masa sigurie.
Me vendimin e datës 1 nëntor, gjykata ka vendosur ndaj tij masën “detyrim paraqitjeje”, si dhe ndalimin për t’u larguar nga njësia administrative në Dibër ku ka vendbanimin, pa marrë më parë autorizimin e gjykatës.
Sipas vendimit, ai duhet të paraqitet pranë Policisë Gjyqësore të Prokurorisë së Tiranës të hënën e parë të çdo muaji, në orën 11:00. Gjithashtu, atij i ndalohet të frekuentojë zonat ku zhvillohen protesta dhe tubime.
Protestuesi dyshohet për veprat penale “Shkatërrimi i pronës” dhe “Organizimi dhe pjesëmarrja në grumbullime e manifestime të paligjshme”.
Vendimi u mor pas shqyrtimit të kërkesës së Prokurorisë për vlerësimin e ligjshmërisë së arrestimit në flagrancë dhe caktimin e masave të sigurimit personal.
