Avokati i Popullit, Endrit Shabani, ka reaguar pas incidentit të ndodhur këtë paradite në një lokal, ku ai po pinte kafe së bashku me prindërit e tij.
Në reagimin e tij, Shabani thotë se personin që iu afrua dhe e fyeu e njeh prej kohësh, pasi kanë qenë shokë gjimnazi. Ai e identifikon atë si Mevlan Mata, aktivist të Partisë “Shqipëria Bëhet”.
Shabani pretendon se ngjarja e sotme erdhi pas një përplasjeje publike të një dite më parë me kryetarin e kësaj partie, lidhur me një video ku ai shfaqej duke përshëndetur dy deputetë.
Në reagimin e tij, Avokati i Popullit sqaron se, për shkak të funksionit që mban, ka detyrim institucional të bashkëpunojë me të gjithë deputetët, pavarësisht përkatësisë politike.
“Dje kryetari i Partisë Shqipëria Bëhet më sulmoi sërish (prej një viti tashmë), duke manipuluar një video ku përshëndesja dy deputetë. Si Avokat i Popullit raportoj çdo muaj në Kuvend dhe kam detyrim institucional të bashkëpunoj me të gjithë deputetët, pa dallim partie.
Por edhe më parë, nuk kam besuar kurrë se kundërshtari duhet trajtuar si armik, aq sa mos i japësh dorën. Jam i bindur se edhe Adriatiku, i cili ka dalë vetë në video duke qeshur me të njëjtët deputetë, e di mirë këtë.
Sot, Mevlan Mata, aktivist i së njëjtës parti, erdhi me kameraman poshtë pallatit ku jetoj, për të më filmuar duke më fyer, ndërsa pija kafe me prindërit e mi. Mevlanin e njoh që në shkollë të mesme dhe më vjen keq që i duhet të japë shenja të tilla besnikërie ndaj partisë.
Kritikën ndaj meje e pranoj, për sa kohë kam zgjedhur një detyrë publike. Por prindërit e mi të moshuar nuk e meritojnë të përfshihen në skena të tilla, sepse nuk janë pjesë e asnjë debati politik dhe nuk kanë asnjë përgjegjësi publike. Besoj fort që shtëpia dhe familja e çdo shqiptari duhet të mbeten të paprekshme, prandaj ky kufi nuk duhet kapërcyer”, thotë ai në reagimin e tij.
Shabani e ka konsideruar të papranueshme përfshirjen e prindërve të tij në përplasjet politike, duke theksuar se kritikat ndaj një zyrtari publik nuk duhet të shtrihen te familjarët e tij.