Fitorja 1-0 e Haken ndaj Goteborgut në kampionatin suedez, ka shërbyer që skuadra e Etrit Berishës të vazhdojë të ngjitë shkallë në renditjen e kampionatit, por edhe për të vazhduar rekordin që po vendos portieri i Kombëtares shqiptare në Suedi.
Me ndeshjen e sotme, portieri 37-vjeçar kuqezi, ka arritur në shifrën mbresëlënëse të 659 minutave radhazi pa pësuar gol në kampionatin suedez.
Hera e fundit në të cilën Berisha ka pësuar gol në kampionat është në humbjen 1-3 ndaj Vasteras, më 29 gusht!
Më pas ka nisur kjo seri ndeshjesh pa pësuar gol për portierin kuqezi, i cili ka vendosur një rekord personal dhe nuk është shumë larg edhe rekordit që i përket kampionatit suedez.
Rekordi është 808 minuta dhe mbahet nga Hakan Svenson i Halmstads në vitet 1999-2000, ndaj Berishës i duhet praktikisht edhe një ndeshje e gjysmë për ta arritur atë.
