Zhgënjimi është i thellë në shtëpinë e Ferrarit pas Çmimit të Madh të Meksikës, ku një fitore dukej e mundshme. Megjithatë, sulmi i Charles Leclerc ndaj Lewis Hamilton në start shkatërroi garën e të dyve. Leclerc mori një penalitet prej pesë sekondash, ndërsa Hamilton doli jashtë piste. Kjo i mundësoi Max Verstappen të kalonte të dy, duke siguruar fitoren, ndërsa Ferrari humbi mundësinë për një rezultat 1-2.
Lewis Hamilton shprehu pakënaqësinë e tij të fortë pas garës, duke deklaruar se “shoku i skuadrës punon kundër teje”. Ai theksoi se interesi i ekipit duhet të jetë gjithmonë në plan të parë, duke shtuar: “Humba një fitore dhe Ferrari humbi pikë për vendin e dytë në kampionatin e konstruktorëve. Kjo është një mungesë respekti ndaj të gjithë njerëzve që punojnë në fabrikë.” Hamilton sugjeroi se nuk ishte çështje moshe, por mentaliteti, dhe se “diçka duhet të ndryshojë” pas bisedimeve sy më sy.
Nga ana e tij, Charles Leclerc u përpoq të ulte tensionet, duke pranuar se penaliteti ishte “qartësisht i merituar”. Ai shpjegoi se të dy pilotët frenuan shumë vonë dhe humbën kthesën. Qëllimi i tij ishte t’i kthente pozicionin Hamiltonit, por ndërhyrja e Max Verstappen e bëri situatën të paqartë. Leclerc theksoi se do të flasin për incidentin.
Tensioni mbetet i lartë brenda ekipit, me drejtorin e skuadrës, Frederic Vasseur, që nuk e fshehu zemërimin e tij. Ai e quajti incidentin “një mungesë të madhe respekti për markën dhe përpjekjet e ekipit”. Vasseur theksoi se ishte e vështirë të pranohej humbja e një fitoreje në këtë mënyrë, veçanërisht pasi ekipi kishte bërë hapa përpara në performancë. “Kur nisesh i pari dhe i treti në Meksikë, nuk pret të përfundosh i dyti dhe i katërti,” tha ai.
Hamilton dhe Leclerc janë gjithashtu në garë të ngushtë në kampionatin individual. Gara e ardhshme në Brazil ofron një mundësi për Ferrarin për të qetësuar polemikat, por Frederic Vasseur do të përballet me sfidën e vështirë për të riparuar marrëdhënien mes dy pilotëve, e cila është dëmtuar ndjeshëm pas incidentit në Meksikë.
Marrë nga La Gazzetta dello Sport