Autoritetet italiane dhe një investigim i Il Gazzettino raportojnë se kapitalet e përfituara nga trafiku i drogës dyshohet se po pastrohen dhe investohen në lokale, restorante dhe biznese tregtare në Venecia. Sipas materialit, grupet kriminale shqiptare kanë një rol të rëndësishëm në furnizimin me shumicë të tregut të drogës, veçanërisht me kokainë dhe marijuanë, dhe po zgjerojnë aktivitetin duke futur paratë e përfituara në ekonomi të ligjshme në rajonin e Venetos.
Hetimet tregojnë se në shumë raste drejtuesit e organizatave kriminale qëndrojnë jashtë Italisë dhe përdorin persona të tjerë për shpërndarjen në rrugë, çka e vështirëson identifikimin dhe goditjen e komandave të rrjeteve. Raportet e Drejtorisë Hetimore Antimafia (DIA) dhe Drejtorisë së Antimafias së Distriktit të Venecias (DDA) përshkruajnë këto grupe si ndër organizatat e huaja më të fuqishme në territor, me aktivitet të përqendruar kryesisht në trafikun e drogës.
Grupet funksionojnë zakonisht në formë klanesh ose familjesh të zgjeruara, të përbëra nga vëllezër, kushërinj dhe persona me lidhje gjaku, të quajtura “Fis” nga hetuesit. Brendë tyre identifikohet një drejtues, i njohur si “Krie”, që shpesh ka edhe një person të dytë në hierarki si krah i djathtë. Një tjetër tipar i evidentuar është se drejtuesit e klaneve ruajnë bazën në vendin e origjinës, ndërsa aktiviteti kriminal shtrihet në territorin italian.
Artikulli përmend disa operacione të zhvilluara gjatë vitit 2026: arrestimin në Tiranë të një shtetasi shqiptar 45-vjeçar, i kërkuar që prej 2022 dhe dyshuar për drejtimin e një rrjeti importi kokainë për Venecian; arrestimin në Dubai të një 39-vjeçari të shpallur në kërkim prej shtatë vitesh, i dyshuar për aktivitet në zona të provincës së Venecias; arrestimin në Spinea të një 21-vjeçari, teksa iu gjetën dy pistoleta dhe rreth 370 gramë lëndë narkotike; dhe operacionin në zonën Frari të Venecias ku u zbulua një ambient për përpunimin e kokainës, u arrestua një rreth 30-vjeçar dhe u sekuestrua afro një kilogram kokainë.
Shqetësimi i autoriteteve lidhet me mundësinë që paratë e drogës të integrohen në ekonominë e ligjshme dhe me lidhje të mundshme midis grupeve kriminale shqiptare dhe organizatave mafioze italiane, përfshirë ‘Ndranghetën’. Hetimet mbeten prioritare për institucionet antimafia në Itali.
