Presidenti i Kinës, Xi Jinping, ka deklaruar se Lindja e Mesme nuk duhet të shndërrohet në arenë të rivalitetit mes fuqive të mëdha, duke bërë thirrje për bashkëpunim ndërkombëtar në funksion të paqes dhe stabilitetit në rajon.
Deklarata u bë gjatë takimit me sulltanin e Omanit, Haitham bin Tariq, i cili ndodhet në një vizitë zyrtare dyditore në Pekin.
Sipas Reuters, Kina po synon të forcojë rolin e saj diplomatik në Lindjen e Mesme, në një kohë kur lufta mes SHBA-së, Izraelit dhe Iranit ka shkaktuar ndërprerje të transportit detar në Ngushticën e Hormuzit dhe ka rritur kostot globale të energjisë.
Xi Jinping ka bërë të ditur se Pekini është i gatshëm të bashkëpunojë me vendet arabe për rikthimin e paqes dhe krijimin e një stabiliteti afatgjatë.
Ndërkohë, i dërguari i posaçëm i Kinës për Lindjen e Mesme pritet të vizitojë Iranin, Omanin dhe Arabinë Saudite gjatë këtij muaji.
Omani, nga ana tjetër, ka shprehur interesim për zgjerimin e bashkëpunimit tregtar dhe investimeve me Kinën.
Zhvillimi vjen në një moment kur kriza në Lindjen e Mesme po ndikon jo vetëm në sigurinë rajonale, por edhe në tregjet ndërkombëtare të naftës, energjisë dhe transportit detar.