Zbardhen detajet e para, si u grabit “Raiffeisen Bank” te Komuna e Parisit

Detaje të reja janë zbardhur lidhur me grabitjen e ndodhur mëngjesin e kësaj të hëne në filialin e “Raiffeisen Bank”, në zonën e Komunës së Parisit, në Tiranë. Pas ngjarjes janë publikuar edhe pamjet nga vendi ku ndodhi grabitja, ndërsa policia ka rrethuar zonën dhe ka nisur veprimet për kapjen e autorit.

Sipas informacioneve paraprake, një person i maskuar dhe i armatosur ka hyrë në ambientet e bankës dhe ka kërcënuar punonjësit me armë zjarri. Në këto kushte, ai ka arritur të marrë një shumë parash dhe më pas është larguar në drejtim të paditur.

Pamjet e publikuara pas ngjarjes tregojnë praninë e forcave të Policisë në zonën përreth filialit bankar, ku janë kryer veprimet e para hetimore.

Ndërkohë, sipas informacioneve paraprake, policia ka arritur të identifikojë personin e dyshuar për grabitjen dhe po punon për lokalizimin dhe arrestimin e tij.

Deri në këto momente nuk ka një njoftim zyrtar për shumën e parave të marra, ndërsa mbetet gjithashtu e paqartë nëse ka persona të lënduar gjatë incidentit.

Hetimet vijojnë për dokumentimin e plotë të ngjarjes dhe sqarimin e të gjitha rrethanave të grabitjes.