Ish-trajneri i Manchester United ‘thumbon’ Cristiano Ronaldon: E ka kryer ciklin para 8 vitesh
Erik ten Hag ka rikthyer kritikat ndaj Cristiano Ronaldos, duke pretenduar se sulmuesi portugez nuk ka arritur të japë kontributin e pritur në fushën e lojës gjatë shtatë apo tetë viteve të fundit të karrierës së tij.
Ish-trajneri i Manchester Unitedit ka folur sërish për marrëdhënien e vështirë që kishte me pesë herë fituesin e “Topit të Artë” gjatë periudhës kur të dy ishin pjesë e klubit anglez.
Në një intervistë për emisionin holandez “Goedemorgen Eredivisie”, Ten Hag u ndal te mosmarrëveshjet me Ronaldon, duke theksuar se problemi kryesor lidhej me mënyrën se si portugezi e shihte rolin e tij brenda skuadrës.
Sipas trajnerit holandez, edhe lojtari më i mirë duhet të jetë i gatshëm të punojë në funksion të grupit dhe jo të presë që e gjithë skuadra të luajë vetëm për të.
“Çdo skuadër e madhe duhet ta përqafojë lojtarin më të mirë, por edhe lojtari më i mirë duhet të punojë për ekipin. Ky ishte problemi me Ronaldon. Lojtarët dëshironin të punonin për të, sepse natyrshëm e shikonin si një idhull”, deklaroi Ten Hag.
Ai shtoi se, sipas vlerësimit të tij, Ronaldo nuk kishte arritur të ruante nivelin e dikurshëm në vitet e fundit.
“Gjatë shtatë apo tetë viteve të fundit, ai thjesht nuk ka qenë në gjendje të japë atë që pritej prej tij. Që nga Juventusi, gjithçka ka përfunduar”, u shpreh holandezi.
Ronaldo u largua nga Juventusi në vitin 2021, pas tri sezonesh në Torino, ku shënoi 101 gola në 134 ndeshje. Më pas u rikthye te Manchester Unitedi, fillimisht nën drejtimin e Ole Gunnar Solskjaer, përpara se në stolin e skuadrës të emërohej Ten Hag.
Megjithatë, ish-trajneri i Unitedit mendon se ndryshimi në performancën e portugezit kishte nisur që pas largimit nga Real Madridi, në vitin 2018.
Për të mbështetur argumentin e tij, Ten Hag përmendi edhe mënyrën se si klubi madrilen menaxhon largimet e futbollistëve që po kalojnë rënie të nivelit.
“Real Madridi ka një dhunti të madhe: ata e dinë se kur duhet të ndahen nga lojtarët, niveli i të cilëve po bie, dhe e bëjnë këtë në momentin e duhur”, deklaroi ai.
Në fund, Ten Hag zbuloi se përpara nisjes së sezonit kishte zhvilluar edhe një bisedë personale me Ronaldon, gjatë së cilës i kishte shpjeguar filozofinë e tij të lojës, mënyrën se si dëshironte të funksiononte Manchester Unitedi dhe përgjegjësitë që priste nga ylli portugez.
Marrëdhënia mes të dyve u përkeqësua ndjeshëm gjatë sezonit 2022-2023, duke kulmuar me largimin e Ronaldos nga Manchester Unitedi në nëntor të vitit 2022.
