Vlora Hyseni kërkon lirinë, mbahet sot seanca në Apelin e GJKKO-së

Ish-drejtoresha e Shërbimit Informativ Shtetëror (SHISH), Vlora Hyseni, do të përballet këtë të hënë me Gjykatën e Posaçme të Apelit, ku do të shqyrtohet kërkesa e saj për ndryshimin e masës së sigurisë “arrest në shtëpi”.

Seanca gjyqësore është caktuar të zhvillohet në orën 13:00, ndërsa në përfundim të shqyrtimit do të vendoset nëse do të ketë ndryshim të masës së sigurisë që është aktualisht në fuqi ndaj ish-kreut të SHISH-it.

Kërkesa e paraqitur nga Vlora Hyseni do të shqyrtohet nga gjyqtari Florian Kalaja, pranë Gjykatës së Posaçme të Apelit (GJKKO).

Në këtë seancë pritet të vlerësohen argumentet e palëve lidhur me masën e sigurisë, ndërsa vendimi i gjykatës do të përcaktojë nëse Hyseni do të vijojë të qëndrojë në arrest shtëpie apo do të ketë një ndryshim të masës së vendosur ndaj saj.