Ylli amerikan zgjedh verdhekuqtë, Kim Kardashian: Jam tifoze e madhe e Romës
Kim Kardashian ka tërhequr vëmendjen gjatë paraqitjes së saj në Festivalin e Filmit në Romë, jo vetëm për praninë në tapetin e kuq, por edhe për një deklaratë të papritur rreth futbollit italian. Ylli amerikan i showbiz-it ka zbuluar se është tifoze e Romës, duke shprehur hapur mbështetjen për skuadrën verdhekuqe.
Sipërmarrësja dhe aktorja ndodhej në kryeqytetin italian për të marrë pjesë në aktivitetet e festivalit, ku prezantoi premierën e sezonit të dytë të serialit “All’s Fair” dhe ku interpreton një nga rolet kryesore.
Gjatë komunikimit me gazetarët në tapetin e kuq të Auditorium Parco della Musica, Kardashian u pyet se cilën skuadër italiane mbështet. Përgjigjja e saj ishte e menjëhershme dhe pa shumë shpjegime.
“Po, unë bëj tifo për Romën. Jam një tifoze e madhe”, deklaroi ajo.
Përgjigjja e Kardashian surprizoi të pranishmit dhe tërhoqi vëmendjen e tifozëve të klubit kryeqytetas. Deklarata e saj i shton Romës një emër të njohur ndërkombëtarisht mes personazheve të famshëm që shprehin simpatinë për futbollin italian.
Kështu, përtej angazhimeve në botën e kinematografisë dhe biznesit, Kim Kardashian ka zbuluar edhe një tjetër preferencë të saj: ngjyrat verdhekuqe të Romës.
