Rreth 40 kilometra në perëndim të Talinit, kryeqytetit të Estonisë, ndodhet një nga destinacionet më të pazakonta turistike në Evropë: guroja e përmbytur e Rummu dhe ish-burgu i Murru, një kompleks që dikur përdorej për punën e detyruar të të burgosurve.
Sot, vizitorët mund të eksplorojnë një peizazh mbresëlënës, ku ujërat ngjyrë bruz mbulojnë ndërtesa industriale dhe struktura të vjetra. Megjithëse zona rrethohet ende nga tela me gjemba, ajo është e hapur për turistët.
Historia e kompleksit nisi përpara pushtimit sovjetik. Gjatë periudhës sovjetike, të burgosurit punonin në nxjerrjen dhe përpunimin e gurit gëlqeror, përfshirë gurin dekorativ Vasalemma, i ngjashëm me mermerin.
Mes viteve 1942 dhe 1944, gjatë pushtimit nazist të Estonisë, objekti funksionoi si kamp ndalimi dhe pune të detyruar. Më vonë, sistemi sovjetik e përdori si koloni pune, ku mbaheshin edhe të burgosur politikë.
Sot, përveç ndërtesave të fundosura, turistët tërhiqen nga kodrat e larta të mbetjeve të gurores, të cilat erozioni i ka shndërruar në formacione që ngjajnë me dallgë. Nga një vend izolimi dhe pune të detyruar, Rummu është shndërruar në një destinacion ku historia dhe natyra krijojnë një peizazh të rrallë.
