Me rastin e 2 Nëntorit, Ditës Ndërkombëtare për Dhënien Fund Pandëshkueshmërisë së Krimeve kundër Gazetarëve, Shoqata e Gazetarëve të Maqedonisë (SHGM) paralajmëron se çdo sulm i lënë pa ndëshkim rrezikon lirinë e mediave dhe të drejtën e publikut për informim. Sipas shoqatës, për ta shmangur këtë duhen reagim efikas nga institucionet dhe drejtësi në kohë.
SHGM thekson se mbrojtja e gazetarëve shkon përtej sigurisë së tyre personale: ajo është kusht për gazetari të lirë e profesionale. Kur kërcënimet, dhuna, presionet dhe sulmet e organizuara në internet nuk sjellin pasoja për autorët, krijohet frikë dhe përcillet ideja se punonjësit mediatikë mund të sulmohen pa u ndëshkuar.
Të lidhura
None found
Shoqata ka vërejtur disa zhvillime pozitive në përgjigjen institucionale gjatë viteve të fundit, sidomos në disa raste të fundit të sulmeve fizike. Megjithatë, ajo thotë se pandëshkueshmëria dhe zvarritja e procedurave mbeten probleme serioze. Disa çështje nuk kanë marrë zgjidhje përfundimtare prej vitesh, ndërsa kërcënimet në internet, ngacmimet dhe fushatat për diskreditimin e gazetarëve po shtohen, veçanërisht ato kundër gazetareve.
SHGM pret që Ministria e Punëve të Brendshme, Prokuroria Publike dhe gjykatat të bashkërendojnë veprimet dhe t’u përgjigjen në kohë e me efikasitet të gjitha sulmeve dhe kërcënimeve ndaj gazetarëve. Sipas saj, denoncimi ose hapja e hetimeve nuk mjaftojnë: institucionet duhet të sqarojnë faktet, të identifikojnë autorët dhe t’i sanksionojnë siç parashikon ligji.
Shoqata kërkon gjithashtu që dhuna digjitale të mos konsiderohet sulm më pak serioz. Kërcënimet në rrjetet sociale, fushatat e organizuara të diskreditimit dhe gjuha e urrejtjes mund të cenojnë drejtpërdrejt sigurinë e gazetarëve dhe gatishmërinë e tyre për të raportuar lirshëm në interes të publikut.
Në mesazhin e saj për 2 nëntorin, SHGM nënvizon se kalimi i kohës nuk mund të zëvendësojë drejtësinë. Çdo sulm që mbetet i pazbardhur është jo vetëm një çështje e pazgjidhur, por edhe një sinjal i mundshëm për autorët e ardhshëm se dhuna ndaj gazetarëve mund të mos ketë pasoja. Shoqata pret rezultate të matshme nga Komiteti Kombëtar.
SHGM përshëndet vendimin për krijimin e Komitetit Kombëtar për Mbrojtjen dhe Sigurinë e Gazetarëve, ku parashihet edhe pjesëmarrja e saj. Sipas shoqatës, ky komitet mund të përmirësojë bashkërendimin mes institucioneve dhe komunitetit mediatik, si edhe të ndihmojë në përmirësimin sistematik të sigurisë së gazetarëve.
Megjithatë, SHGM vlerëson se komiteti duhet gjykuar nga rezultatet konkrete. Plani Kombëtar i Veprimit, sipas saj, duhet të përcaktojë detyrime të qarta, afate dhe tregues të matshëm për institucionet, krahas një mekanizmi për ndjekjen dhe raportimin e rregullt të zbatimit. Vetëm kështu komiteti mund të funksionojë me efikasitet, në vend që të mbetet një organ formal koordinues.
Për këtë proces, SHGM e konsideron të domosdoshme përfshirjen aktive të Prokurorisë Publike dhe gjyqësorit. Pa pjesëmarrjen e tyre të drejtpërdrejtë, thotë shoqata, nuk mund të ketë përgjigje të plotë institucionale ndaj sulmeve. Mbrojtja e gazetarëve nuk mbaron me ndërhyrjen e policisë; ajo kërkon veprim në kohë nga prokuroria dhe zgjidhje efikase në gjykata.
