Gjykata Themelore në Gjilan ka konfirmuar se Adonis Demiri, 27-vjeçari i vrarë në fshatin Demiraj bashkë me foshnjën e tij tre muajshe, ishte dënuar më parë për kanosje ndaj të fejuarës.
Sipas përgjigjes së gjykatës për Dukagjinin, Demiri ishte mbajtur për dy muaj në Institutin e Forenzikës Psikiatrike në Prishtinë në prill të vitit 2026, pasi dyshohej se kishte përdorur kokainë.
Eksperti psikiatër i kishte rekomanduar gjykatës dërgimin e tij në këtë institut për shkak të varësisë nga substancat narkotike.
“I njëjti ka qëndruar nën masën e paraburgimit prej 2 (dy) muaj në Institutin e Forenzikës Psikiatrike në Prishtinë, pasi që i njëjti dyshohet të ketë përdorur substanca narkotike të llojit kokainë. Eksperti psikiatër i ka rekomanduar gjykatës që i njëjti të dërgohet në këtë institut për shkak varësisë së substancave narkotike”.
Më 17 qershor 2026, Gjykata Themelore në Gjilan – Dega në Kamenicë, e kishte dënuar Demirin me gjashtë muaj burgim për veprën penale të kanosjes. Me pëlqimin e tij, dënimi ishte zëvendësuar me gjobë prej 1 mijë e 800 eurosh, të cilën ishte i obliguar ta paguante brenda 15 ditësh nga plotfuqishmëria e aktgjykimit.
Gjykata ka bërë të ditur se e dëmtuara nuk i ishte bashkëngjitur ndjekjes penale dhe nuk kishte paraqitur kërkesë për kompensim të dëmit.
“Me datë 17.06.2026, Dega e Gjykatës Themelore në Kamenicë ka nxjerrë aktgjykim ndaj Adonis Demirit duke i shqiptuar dënim me burgim në kohëzgjatje prej 6 (gjashtë) muaj, në kuptim të nenit 44 të KPRK-së me pëlqimin e të akuzuarit i zëvendësohet në dënim me gjobë prej 1.800 Euro, të cilin dënim është i detyruar të paguaj në afat prej 15 ditësh nga dita e plotfuqishmërisë së këtij aktgjykimi. Pala e dëmtuar E. K. nuk i është bashkëngjit ndjekjes penale dhe nuk ka parashtruar kërkesë pasurore juridike”.
Po ashtu, në bazë të dispozitave ligjore për kryerësit me çrregullime mendore, gjykata i kishte shqiptuar Demirit masën e trajtimit të detyrueshëm psikiatrik në liri.
Babai i 27-vjeçarit arrestohet si i dyshuar në rastin e vrasjes së rëndë në Gjilan