Ernest Muçi shënoi një supergol nga distanca më 1 nëntor, për të vulosur fitoren 2-0 të Trabzonsporit ndaj Gaziantep. Ylli i Kombëtares po shkëlqen në Turqi ku çdo detaj përbën lajm.

Një detaj interesant është edhe minuta e 61-të, kur Muçi tundi rrjetën. Mesfushori me tipare sulmuese u bë lojtari i parë që gjen golin në atë minutë, që nga shtatori i vitit 2023 në Superligën turke.

Asokohe ishte Edin Visca që shënonte për Beshiktashin. I veçantë është edhe fakti i numrit 61, që përkon me kodin e targës së qytetit të Trabzonit. Nga tifozët përdoret si simbol identifikues.

Entuziazmi i golit pushtoi tifozët që ishin të shumtë në stadium. Deri tani janë pesë fitore në po kaq ndeshje në shtëpi për Trabzonin.