Vendet evropiane anëtare të NATO-s po shqyrtojnë skenarët e mundshëm pas zgjedhjeve të mesmandatit në Shtetet e Bashkuara, të shqetësuara se një humbje e republikanëve mund të sjellë një përshkallëzim të qëndrimeve të presidentit Donald Trump ndaj aleancës. Sipas një raportimi të Politico, i cili citon pesë diplomatë të NATO-s në kushte anonimiteti, në kryeqytetet evropiane ekziston frika se Trump mund të reagojë duke shtuar presionin ndaj aleatëve, nëse demokratët arrijnë të marrin kontrollin e Kongresit.
Diplomatët druajnë se kufizimet që mund t’i vendosë Kongresi në politikat e brendshme mund ta shtyjnë presidentin amerikan të përqendrohet më shumë te politika e jashtme, ku kompetencat e tij si komandant i përgjithshëm janë më të gjera. Një nga skenarët që po shqyrtohet është reduktimi i mëtejshëm i pranisë ushtarake amerikane në kontinentin evropian. Tre diplomatë kanë shprehur shqetësimin se Uashingtoni mund të tërheqë mijëra trupa shtesë nga Evropa.
Një zyrtar i lartë evropian i mbrojtjes vlerësoi se presidentët, veçanërisht në fazën e fundit të mandatit, mund të ndërthurin pakënaqësitë politike me vendime të paparashikueshme në politikën e jashtme. Sipas tij, kritikat ndaj NATO-s janë pjesë e qëndrueshme e qëndrimit politik të Trumpit. Nga ana e saj, Shtëpia e Bardhë i ka hedhur poshtë shqetësimet për angazhimin e presidentit ndaj aleancës. Zëdhënësja ndihmëse për shtyp, Olivia Wales, deklaroi për Politico se Trump ka bërë më shumë se çdo president tjetër për NATO-n.
Ajo veçoi marrëveshjet për rritjen e shpenzimeve të mbrojtjes së vendeve anëtare në 5% të PBB-së deri në vitin 2035, forcimin e pranisë ushtarake amerikane në Groenlandë dhe përpjekjet për t’i dhënë fund luftës së Rusisë kundër Ukrainës. Megjithatë, administrata amerikane pranoi se Trump mbetet i pakënaqur me qëndrimin e disa aleatëve të NATO-s gjatë konfliktit në Iran. Shtëpia e Bardhë theksoi se presidenti do të vazhdojë të mbrojë interesat amerikane, si brenda vendit, ashtu edhe në arenën ndërkombëtare.
Zgjedhjet e së martës konsiderohen një provë e rëndësishme politike për Trumpin. Demokratët shihen si favoritë për të fituar shumicën në Dhomën e Përfaqësuesve, ndërsa gara për kontrollin e Senatit mbetet gjithashtu në vëmendje. Një rezultat i tillë mund të ndryshojë ekuilibrat politikë në Uashington dhe të shtojë pasigurinë për të ardhmen e marrëdhënieve mes SHBA-së dhe aleatëve të saj evropianë.