Artan Hoxha foli në emisionin “Prime News24” për vizitën e ministrit të Drejtësisë, Toni Gogu, te Erion Veliaj në burgun e Fierit. Gazetari e përshkroi takimin si një formë kërcënimi mafioz dhe theksoi se zhvillimi i tij në orën 22:30, jashtë orarit normal të vizitave, dëshmonte për një situatë të jashtëzakonshme.
“Ajo që ndodhi në burgun e Fierit ishte kërcënim mafioz. As Putini nuk e bën atë kërcënim në atë mënyrë. Ministri shkon në burg në orën 22:30. Ka një orar kur hyhet dhe një orar kur nuk hyhet, përveç rasteve të emergjencës. Duket që është një hall i madh dhe është në vazhdën e atij kërcënimi tipik mafioz”, deklaroi Hoxha, i cili e cilësoi kryeministrin Edi Rama “burracak”.
Të lidhura
None found
Gazetari tha se kishte komunikuar me avokatin e Veliajt, si edhe me burime brenda burgut të Fierit. Sipas tij, gjendja dhe trajtimi i kryebashkiakut ngrenë shqetësime, pasi Veliaj, ndonëse ka dëmtim në këmbë, është vendosur në një sektor ku vuajnë dënimin persona të dënuar për krime të rënda. Hoxha pretendoi gjithashtu se ai është mbajtur për 48 orë në një qeli pa dritare, se del për ajrim i vetëm dhe se monitorohet në mënyrë të vazhdueshme.
Duke iu përgjigjur deklaratave të ministrit Gogu, i cili ka mohuar se gjatë takimit ka përcjellë kërcënime, Hoxha u shpreh se i jep më shumë besim versionit të Erion Veliajt. Në argumentimin e tij, ai përmendi edhe faktin që kryebashkiaku ka qëndruar në burg për 20 muaj, ndërsa ministri e ka vizituar vetëm tani.
Sipas Hoxhës, përplasja mes palëve lidhet me kontrollin mbi Bashkinë e Tiranës dhe me zgjedhjet e ardhshme vendore. Ai pretendoi se Veliaj ka rifituar ndikimin në bashki që nga mesi i shtatorit, duke larguar persona të vendosur aty nga Rama, gjë që, sipas gazetarit, ka përshkallëzuar konfliktin mes tyre.
Hoxha deklaroi se mesazhi që, sipas letrës së Veliajt, i është përcjellë nga Gogu ishte që ai të hiqte dorë nga drejtimi i Bashkisë së Tiranës ose të përballej me akuza dhe me mundësinë e një dënimi prej 100 vitesh burg.
Në përfundim, gazetari kërkoi që të hetohet përgjegjësia e institucioneve penitenciare dhe mënyra se si u organizua takimi në orët e vona të natës. Ai iu referua edhe drejtimit të qarkut të Fierit dhe emërimit të drejtueses së burgut, duke përmendur rolin e Belinda Ballukut si drejtuese e PS-së në këtë qark.
