Amerikanët votojnë sot/ Beteja për Kongresin, çfarë rrezikon Trump dhe 3 skenarët e mundshëm

Demokratët synojnë të rimarrin kontrollin e Kongresit, ndërsa republikanët kërkojnë të ruajnë shumicën në të dyja dhomat.

Zgjedhjet e 3 nëntorit zhvillohen në një klimë të tensionuar politike, ku ekonomia, rritja e kostos së jetesës, imigracioni dhe politika e jashtme janë ndër çështjet kryesore që po ndikojnë te votuesit amerikanë.

Edhe pse emri i Trump nuk figuron në fletëvotim, presidenti është kthyer në një nga figurat qendrore të kësaj fushate. Demokratët po përpiqen ta shndërrojnë votimin në një vlerësim të drejtimit të tij të vendit, ndërsa republikanët synojnë të ruajnë mbështetjen e elektoratit dhe kontrollin mbi procesin legjislativ.

Sondazhi i fundit i Reuters/Ipsos, i publikuar të hënën, e vendos miratimin e punës së Trump në 32%, pranë nivelit më të ulët të karrierës së tij politike. Në preferencën kombëtare për zgjedhjet e Kongresit, demokratët kryesojnë me 46%, kundrejt 38% të republikanëve.

Një tjetër tregues domethënës është qëndrimi i votuesve të pavarur. Sipas të njëjtit sondazh, gjysma e tyre deklarojnë se po votojnë kundër Trump, ndërsa vetëm 13% thonë se zgjedhja e tyre është në mbështetje të presidentit.

Shqetësimi kryesor i amerikanëve mbetet ekonomia. Rreth 78% e të anketuarve e konsiderojnë rritjen e shpenzimeve të përditshme një faktor shumë ose jashtëzakonisht të rëndësishëm në vendimin e tyre për votën.

Për menaxhimin e kësaj çështjeje, 43% e të anketuarve shprehen në favor të demokratëve, ndërsa 32% mbështesin republikanët.

Çmimet e ushqimeve, kostot e strehimit, transporti dhe presioni mbi buxhetet familjare janë kthyer në argumente kryesore të debatit politik. Demokratët kritikojnë administratën Trump për mosrealizimin e premtimeve për uljen e kostos së jetesës, ndërsa republikanët mbrojnë politikat e tyre ekonomike dhe kërkojnë kufizimin e shpenzimeve qeveritare.

Në zgjedhjet e sotme janë në garë të 435 vendet e Dhomës së Përfaqësuesve, ndërsa për Senatin votohet për 35 vende.

Sipas vlerësimeve të Cook Political Report, demokratët kanë mundësi të fitojnë nga 15 deri në 25 vende në Dhomën e Përfaqësuesve. Megjithatë, gara për Senatin paraqitet më e vështirë për ta, pasi u nevojitet një fitim neto prej katër vendesh për të arritur shumicën prej 51 senatorësh.

Vëmendja është përqendruar te disa shtete ku rezultatet mund të ndikojnë drejtpërdrejt në ekuilibrin e pushtetit, mes tyre Teksasi, Kansas, Karolina e Veriut, Maine dhe Michigan.

Në këto shtete, demokratët shpresojnë të përfitojnë nga pakënaqësia me politikat e administratës, ndryshimet demografike dhe mobilizimi i votuesve të rinj e të pavarur. Nga ana tjetër, republikanët synojnë të ruajnë avantazhin në zonat ku kanë pasur mbështetje tradicionale.

Një tjetër element që ka ndikuar në fushatën zgjedhore është lufta me Iranin dhe pasojat e saj ekonomike.

Rritja e çmimeve të karburantit dhe ndikimi i konfliktit në ekonominë amerikane kanë shtuar presionin ndaj administratës Trump. Demokratët kërkojnë më shumë llogaridhënie për përfshirjen ushtarake të SHBA-së, ndërsa republikanët mbrojnë qëndrimin e qeverisë duke argumentuar se vendimet janë të nevojshme për sigurinë kombëtare.

Në debat janë përfshirë gjithashtu tarifat tregtare dhe pasojat e tyre për industrinë, bujqësinë dhe marrëdhëniet ekonomike të Shteteve të Bashkuara me partnerët ndërkombëtarë.

Fushata është karakterizuar edhe nga shpenzime të konsiderueshme financiare. Sipas Associated Press, organizatat e lidhura politikisht me Trump kanë shpenzuar rreth 277 milionë dollarë në mbështetje të kandidatëve republikanë.

Rezultati i zgjedhjeve mund të sjellë tre skenarë kryesorë për Uashingtonin.

Nëse republikanët ruajnë kontrollin e të dyja dhomave, Trump do të ketë më shumë hapësirë për të çuar përpara axhendën e tij legjislative deri në përfundim të mandatit.

Në rast se demokratët fitojnë Dhomën e Përfaqësuesve, ndërsa republikanët mbajnë Senatin, vendi do të përballet me një Kongres të ndarë. Ky rezultat do t’u jepte demokratëve më shumë mundësi për kontroll parlamentar dhe mbikëqyrje të administratës.

Skenari i tretë është fitorja e demokratëve në të dyja dhomat, çka do të kufizonte ndjeshëm hapësirën politike të presidentit për të miratuar nisma të reja pa marrëveshje me opozitën.

Pavarësisht rezultatit, Trump do të ruajë kompetencat kushtetuese të presidentit, përfshirë të drejtën e vetos dhe drejtimin e degës ekzekutive.

Zgjedhjet e sotme konsiderohen gjithashtu një tregues i rëndësishëm për garën presidenciale të vitit 2028. Për demokratët, ato do të tregojnë nëse kanë arritur të rikthejnë mbështetjen e grupeve të rëndësishme të votuesve, ndërsa për republikanët do të jenë një provë e qëndrueshmërisë së koalicionit elektoral të ndërtuar nga Trump.

Rezultatet e para pritet të publikohen pas mbylljes së qendrave të votimit, ndërsa vëmendja do të përqendrohet te zonat konkurruese për Dhomën e Përfaqësuesve dhe garat e ngushta për Senatin, të cilat do të përcaktojnë se me çfarë shumice parlamentare do të qeverisë Trump në dy vitet e fundit të mandatit të tij.

Top Channel