Një kompjuter kuantik i kompanisë IBM ka arritur të përfundojë në vetëm 19 sekonda një detyrë llogaritëse që, sipas studiuesve, do t’i kërkonte një superkompjuteri klasik më shumë se një shekull për ta realizuar.
Rezultati është arritur duke përdorur procesorin kuantik Nighthawk r2, një pajisje me 120 kubitë që është e disponueshme edhe për përdoruesit përmes shërbimeve cloud të IBM. Kjo e bën arritjen veçanërisht të rëndësishme, pasi eksperimenti nuk është kryer me një pajisje të ndërtuar posaçërisht në laborator.
Studiuesit e startup-it BlueQubit, me bazë në San Francisko, e testuan procesorin me një detyrë të njohur si Random Circuit Sampling. Në këtë proces, kubitët kryejnë një seri operacionesh kuantike të zgjedhura në mënyrë të rastësishme dhe më pas prodhojnë rezultate të përbëra nga vargje me zero dhe një.
Nighthawk r2 arriti të gjenerojë 1 milion mostra në vetëm 19 sekonda. Studiuesit vlerësojnë se simulimi i të njëjtit proces në superkompjuterin amerikan Frontier do të kërkonte rreth 110 vite kohë llogaritëse.
Studimi është publikuar në platformën arXiv dhe ende nuk i është nënshtruar procesit të rishikimit shkencor nga kolegët. Arritja shihet si një tjetër dëshmi e potencialit të kompjuterëve kuantikë për të kryer detyra specifike që janë jashtëzakonisht të vështira për kompjuterët klasikë.
