Legjenda italiane vlerëson lart Zhegrovën: Nëse shkoj në luftë, dua lojtarë si ai
Fitorja e Juventusit ndaj Napolit ka nxitur diskutime të reja rreth potencialit të skuadrës së Luciano Spallettit. Në këtë debat është përfshirë edhe ish-sulmuesi legjendar i bardhezinjve, Fabrizio Ravanelli, i cili ka kërkuar që Edon Zhegrova dhe Kerim Alajbegoviç të kenë më shumë minuta në dispozicion.
Duke folur në emisionin “Penna Bianca”, të transmetuar në kanalin e Tuttosport në YouTube, Ravanelli ka kritikuar mungesën e personalitetit dhe guximit te Juventusi, sidomos në situatat kur skuadra përballet me vështirësi.
Ish-futbollisti italian ka veçuar paraqitjen e Alajbegoviçit, duke vlerësuar mënyrën se si talenti 19-vjeçar mori përgjegjësi dhe ndikoi në lojën e ekipit.
“Gjithmonë kemi thënë se Juventusit i mungon personaliteti. Mbrëmë, ndeshjen e vendosi një lojtar 19-vjeçar, prandaj ose e ke personalitetin, ose nuk e ke. Kur isha 17 vjeç, tashmë gjuaja penallti për Perugian në Serie C”, është shprehur Ravanelli.
Ai ka theksuar se Alajbegoviçi nuk u dallua vetëm për golin, por edhe për iniciativën, kërkimin e vazhdueshëm të topit dhe përpjekjet për të krijuar epërsi në fazën sulmuese.
Megjithatë, vëmendje të veçantë në deklaratat e tij ka marrë edhe Edon Zhegrova. Ravanelli ka shprehur pakënaqësi për minutazhin e kufizuar të reprezentuesit të Kosovës, duke mos e kuptuar arsyen pse ai nuk po e nis më shpesh ndeshjen nga minuta e parë.
“Nuk mund ta kuptoj pse Zhegrova nuk arrin kurrë ta nisë ndeshjen si titullar. Duhet të kemi lojtarë te të cilët mund të mbështetemi edhe në momentet e vështira, kur të tjerët fshihen. Nëse shkoj në luftë, dua lojtarë të tillë”, ka deklaruar ai.
Ravanelli ka rikujtuar gjithashtu ndikimin e Zhegrovës në një prej aksioneve që çoi te goli ndaj Napolit, duke nënvizuar se futbollistët me karakteristika dhe guxim të tillë duhet të jenë vazhdimisht në dispozicion të skuadrës në fushë.
“Për mua, Zhegrova dhe Alajbegoviçi duhet të luajnë te Juventusi. Pastaj duhet ta përshtatim ekipin, por ata absolutisht duhet të jenë në fushë. Mendoj se Spalletti duhet të jetë i kënaqur me Alajbegoviçin, duke parë mënyrën se si reagoi”, ka shtuar ish-sulmuesi.
Në përfundim, Ravanelli ka vlerësuar edhe mentalitetin e Alajbegoviçit, duke theksuar se trajneri Luciano Spalletti duhet ta shfrytëzojë karakterin dhe personalitetin që ka treguar futbollisti i ri.
“Luciano e do sfidën dhe duhet ta ketë kuptuar se ka në dispozicion një lojtar me karizëm. Ai bëri gjëra që i bëjnë futbollistët e guximshëm, të cilët nuk e ndiejnë presionin”, ka përfunduar Ravanelli.
Deklaratat e tij përbëjnë një mbështetje të rëndësishme për Zhegrovën, i cili vazhdon të kërkojë një rol më të madh në planet e Spallettit. Mesazhi i Ravanellit është i qartë: Juventusi ka nevojë për futbollistë që marrin përgjegjësi dhe nuk tremben nga presioni, ndërsa Zhegrova dhe Alajbegoviçi janë dy prej tyre.
