Vdekja e futbollistit De Miguel/ Portieri Owono në shok, rrezikon deri në 4 vite burg
Vdekja tragjike e sulmuesit të Tenerife-s, Jesús de Miguel, pas përplasjes së rëndë me portierin e Andorrës, Jesús Owono, ka hapur një debat të madh edhe për përgjegjësinë ligjore të gardianit.
Portieri nga Guinea Ekuatoriale thuhet se është i tronditur nga ajo që ndodhi në fushën e lojës, ndërsa ngjarja tashmë ka ngritur pikëpyetje në lidhje me pasojat e mundshme penale që mund të përballet ai.
Sipas raportimeve të mediave ndërkombëtare, rasti mund të marrë edhe përmasa gjyqësore, nëse autoritetet spanjolle vlerësojnë se ndërhyrja e Owono-s përbënte pakujdesi të rëndë, përtej rrezikut normal që shoqëron një ndeshje futbolli.
Në bazë të nenit 142 të Kodit Penal spanjoll, shkaktimi i vdekjes nga pakujdesia e rëndë mund të dënohet me burgim nga një deri në katër vjet. Ndërsa, në rastet kur konstatohet pakujdesi më e lehtë, parashikohen gjoba nga tre deri në 18 muaj.
Megjithatë, kjo nuk do të thotë se Owono do të dënohet automatikisht. Përgjegjësia e tij penale varet nga hetimet dhe nga fakti nëse mund të provohet se veprimi i tij e tejkaloi rrezikun e zakonshëm të një dueli futbollistik dhe se ekziston lidhje e drejtpërdrejtë mes ndërhyrjes dhe vdekjes së futbollistit.
Pamjet filmike të ndeshjes, raporti i gjyqtarit, ekspertizat mjekësore dhe rrethanat e përplasjes mund të jenë vendimtare për një vlerësim të tillë.
Duhet theksuar se Owono u ndëshkua me karton të kuq gjatë ndeshjes, por ky vendim është pjesë e drejtësisë sportive dhe nuk përbën një dënim penal. Dy procedurat janë të ndara dhe përgjegjësia penale duhet të provohet nga autoritetet përkatëse.
Një tjetër element i rëndësishëm është dallimi mes një ndërhyrjeje të gabuar gjatë lojës dhe një veprimi që mund të konsiderohet neglizhencë penalisht e dënueshme. Fakti që përplasja pati pasoja fatale nuk mjafton, në vetvete, për të vërtetuar fajësinë e portierit.
Ndërkohë, vdekja e Jesús de Miguel, në moshën vetëm 30-vjeçare, ka tronditur futbollin spanjoll. Një duel për topin në minutat e fundit të ndeshjes Tenerife-Andorra përfundoi në tragjedi, duke lënë pas dhimbje të madhe në të dyja skuadrat.
Për momentin, nuk ka një vendim gjyqësor që përcakton përgjegjësinë penale të Owono-s. Çdo hap i mëtejshëm do të varet nga hetimet dhe provat që do të mblidhen për këtë ngjarje tragjike.
