Studentët kanë ironizuar kryeministrin Edi Rama lidhur me thirrjet e tij për dialog, ndërsa vijojnë të këmbëngulin se kërkesa e tyre për dorëheqjen e tij është e panegociueshme.
Në ambientet e Universitetit Politeknik, të rinjtë kanë vendosur mbi disa karrige fotografi që dokumentojnë dhunën policore ndaj protestuesve. Krahas tyre kanë vendosur edhe letra me mbishkrimin “Diktator”, në një mesazh drejtuar kryeministrit.
Edhe këtë mëngjes, studentët kanë nisur marshimin në universitetet dhe fakultetet e kryeqytetit, duke vijuar protestën kundër qeverisë dhe duke bërë thirrje për bojkotimin e procesit mësimor.
Pas Universitetit Politeknik, marshimi është drejtuar drejt Universitetit të Arteve, ndërsa më pas të rinjtë pritet të vijojnë në fakultetet e tjera të Tiranës, ku do t’u kërkojnë studentëve t’u bashkohen protestave dhe të braktisin auditorët.
“Protestë deri në dorëheqjen e Ramës” është mesazhi që shoqëron lëvizjen e tyre. Studentët deklarojnë se nuk do të tërhiqen deri në plotësimin e kërkesave.
Ata bëjnë me dije se kanë zhvilluar diskutime dhe kanë vendosur bashkëpunim me grupe studentësh në universitete të ndryshme, përfshirë edhe studentët e Mjekësisë, me synimin për të zgjeruar bojkotin dhe për të bashkuar protestën në të gjitha fakultetet.
