GJKKO lë në burg përgjegjësin e Policisë Shkencore, Fatjon Kalluçi, liron Embro Sulejmanin

Gjykata e Posaçme e Apelit ka marrë vendimin përfundimtar lidhur me masat e sigurisë ndaj Fatjon Kalluçit dhe Embro Sulejmanit, dy personave të arrestuar në kuadër të hetimeve për skandalin e AKSHI-t, të cilët dyshohet se kanë ndihmuar Ergys Agasin gjatë kohës kur ky i fundit ishte në kërkim nga autoritetet.

Pas shqyrtimit të çështjes, gjykata ka vendosur të lërë në fuqi masën e arrestit në burg për Fatjon Kalluçin. Ndërkohë, për Embro Sulejmanin, administratorin e kompleksit “Kodra e Kuajve”, është vendosur një masë më e lehtë sigurie, duke e nxjerrë nga qelia, por duke i kufizuar lëvizjen jashtë vendit dhe duke e detyruar të paraqitet periodikisht pranë policisë gjyqësore.

Sipas vendimit, Sulejmani nuk mund të largohet nga territori i Shqipërisë pa marrë më parë autorizimin e gjykatës. Gjithashtu, atij i ndalohet përdorimi i dokumenteve të identifikimit për të udhëtuar jashtë shtetit pa lejen përkatëse.

Administratori i “Kodrës së Kuajve” do të duhet të paraqitet të hënën e parë dhe të tretë të çdo muaji, në orën 09:00, pranë oficerit të policisë gjyqësore që po heton çështjen. Ai duhet të paraqitet gjithashtu sa herë që thirret nga organet proceduese.

Me këtë vendimmarrje, GJKKO ka miratuar masën e arrestit në burg për Kalluçin, ndërsa ka ndryshuar vendimin e mëparshëm për Sulejmanin, duke urdhëruar lirimin e tij të menjëhershëm, nëse nuk mbahet i ndaluar për ndonjë çështje tjetër ligjore.

Të dy personat janë pjesë e hetimeve që lidhen me dyshimet për ndihmën e dhënë Ergys Agasit gjatë periudhës kur ai ishte person në kërkim. Hetimet për skandalin e AKSHI-t vijojnë, ndërsa vendimi i gjykatës parashikon që përmbajtja e tij të mos publikohet deri në përfundimin e hetimeve paraprake.

Vendimi është shpallur në Tiranë më 3 nëntor 2026, nga gjyqtari Florjan Kalaja. Kundër tij mund të ushtrohet rekurs në Gjykatën e Lartë brenda 45 ditëve nga dita pas njoftimit të vendimit të arsyetuar.

NJOFTIMI I GJKKO:

1. Miratimin e Vendimit nr. 67, datë 21.09.2026 të Gjykatës së Posaçme të Shkallës së Parë për Korrupsionin dhe Krimin e Organizuar, sa i takon disponimeve kundrejt Z.E.S.

2. Ndryshimin e Vendimit nr. 70, datë 24.09.2026 të Gjykatës së Posaçme të Shkallës së Parë për Korrupsionin dhe Krimin e Organizuar, sa i takon disponimeve kundrejt Z. E.S.

3. Caktimin e masës së sigurimit “Ndalimi i daljes jashtë shtetit”, të parashikuar nga neni 233 i Kodit të Procedurës Penale, ndaj Z. E.S..

4. Urdhërimin e Z. E.S. të mos largohet nga territori i Republikës së Shqipërisë pa autorizimin paraprak të gjykatës.

5. Ndalimin e përdorimit të dokumenteve identifikuese për daljen jashtë shtetit të Z. E.S. pa autorizimin paraprak të gjykatës.

6. Caktimin ndaj Z. E.S. të masës së sigurimit “Detyrimi për t’u paraqitur në policinë gjyqësore”, sipas nenit 234 të Kodit të Procedurës Penale.

7. Detyrimin e Z. E.S. të paraqitet të hënën e parë dhe të tretë të çdo muaji, në orën 09:00, para oficerit të policisë gjyqësore që heton çështjen si dhe sa herë të thirret nga organet proceduese në vijim të procedimit penal.

8. Urdhërimin e lirimit të menjëhershëm të Z. E.S., nëse liria e tij personale nuk kufizohet për një shkak tjetër ligjor.

9. Miratimin e Vendimit nr. 70, datë 24.09.2026 të Gjykatës së Posaçme të Shkallës së Parë për Korrupsionin dhe Krimin e Organizuar, sa i takon disponimeve kundrejt Z. F.K.

10. Urdhërohet Prokuroria e Posaçme Kundër Korrupsionit dhe Krimit të Organizuar për ekzekutimin e këtij vendimi.

11. Në bazë dhe për zbatim të nenit 103 të Kodit të Procedurës Penale, ndalohet publikimi i këtij vendimi deri në mbylljen e hetimeve paraprake.

12. Kundër këtij vendimi mund të bëhet rekurs në Gjykatën e Lartë brenda 45 ditëve, duke nisur ky afat nga e nesërmja e njoftimit të vendimit të arsyetuar.

U shpall në Tiranë, me datë 03.11.2026.

GJYQTAR
FLORJAN KALAJA