Rama në Samitin e Euronews: Po punojmë fort për të mbyllur negociatat me BE deri në fund të 2027

Kryeministri Edi Rama tha në fjalën e mbajtur gjatë samitit të Euronews për Zgjerimin në Bruksel se, synimi i Shqipërisë është të mbyllë negociatat me Bashkimin Evropian deri në fund të vitit 2027.

Rama u shpreh skeptik me afatet e vendosura herë pas here nga Bashkimi Evropian lidhur me Shqipërinë, por theksoi se vendi ynë është duke punuar fort në një front të përbashkët me Komisionin Evropian për të arritur këtë objektiv.

“Jam i vjetër në këtë gjë, kam parë gjëra që nuk do t’i besonit. Nuk e di, ajo që di me siguri është se kemi punuar shumë fort. Në këtë rrugëtim ka afate që janë fashitur rrugës, kam parë se si BE nuk i ka mbajtur premtimet, por edhe ka bërë gjëra të mëdha. Ajo çfarë di si fakt është që ne po punojmë shumë fort në një plan të përbashkët, të mbështetur plotësisht nga Komisioni Evropian për t’i përmbyllur negociatat me Bashkimi Evropian deri në fund të 2027”, tha Rama.