Një aksident tragjik ajror ka ndodhur në ishullin jugor të Zelandës së Re, ku një avion i vogël është rrëzuar në një zonë të largët, duke shkaktuar vdekjen e dy personave.
Sipas policisë vendase, avioni ishte nisur nga aeroporti i Nelsonit rreth orës 09:10 të mëngjesit, por nuk kishte mbërritur në destinacionin e tij.
Autoritetet u njoftuan pak para mesditës se avioni kishte vonuar mbërritjen. Menjëherë pas kësaj, ekipet e kërkim-shpëtimit nisën operacionin për gjetjen e tij, me ndihmën e dy helikopterëve.
Pas disa orësh kërkimesh, mbetjet e avionit u lokalizuan në një zonë malore dhe të vështirë për t’u arritur, në jug të majës Castor Peak, pranë qytetit Nelson.
Komandanti i policisë së zonës, Steven Collins, konfirmoi se dy personat që ndodheshin në avion kanë humbur jetën.
Autoritetet kanë nisur procedurat për rikuperimin e viktimave, ndërsa hetuesit e Autoritetit të Aviacionit Civil do të shqyrtojnë vendin e aksidentit për të përcaktuar shkaqet e rrëzimit.
Deri më tani, identiteti i viktimave dhe shkaku i aksidentit nuk janë bërë publikë.
Hetimet për zbardhjen e plotë të kësaj tragjedie ajrore janë në vazhdim.