Aksidenti tragjik hekurudhor në Spanjë, qeveria përgatit ndihma për familjarët e viktimave, ministrit të Transporteve “gjyq” në Parlament

Ndërkohë, qeveria po përgatit një paketë emergjente ndihme financiare për të mbijetuarit dhe familjarët e viktimave.

Përplasja e trenave të shpejtësisë së lartë, aksidenti më i rëndë hekurudhor në Evropë që prej vitit 2013, ka nxitur kërkesa të shumta për dorëheqjen e ministrit Puente, përfshirë edhe nga aleatët e koalicionit qeverisës.

Ky ishte aksidenti i dytë në të njëjtën linjë hekurudhore gjatë këtij viti, pas tragjedisë së janarit, ku humbën jetën 46 persona.

Pavarësisht kritikave, Puente ka refuzuar të japë dorëheqjen, duke deklaruar se përgjegjësia e tij është të përballet me situatën, të sqarojë publikisht rrethanat e aksidentit dhe të marrë masat e nevojshme për përmirësimin e sigurisë hekurudhore.

Ministri pritet të dalë përpara Deputacionit të Përhershëm të Parlamentit në orën 17:00, sipas kohës lokale. Ky organ ushtron kompetenca të kufizuara parlamentare gjatë periudhës ndërmjet legjislaturave, përpara zgjedhjeve të parashikuara për më 29 nëntor.

Kryeministri spanjoll Pedro Sánchez njoftoi të hënën se qeveria do të miratojë një paketë masash që parashikon dyfishimin e dëmshpërblimeve për viktimat, në kuadër të sigurimit të detyrueshëm të udhëtarëve.

Paketa përfshin gjithashtu përshpejtimin e pagesave të kompensimit dhe përmirësimin e mbështetjes financiare për personat që kanë mbetur përkohësisht të paaftë për punë si pasojë e aksidentit.

Gjatë fjalës së mbajtur në forumin “World in Progress” në Barcelonë, Sánchez theksoi se përparësia e qeverisë është mbështetja e të prekurve nga tragjedia dhe rikthimi sa më i shpejtë i besimit të qytetarëve te transporti hekurudhor i shpejtësisë së lartë.

Këshilli i Ministrave pritet të miratojë paketën këtë të martë, ndërsa ministri Puente do të paraqesë edhe masa të reja për forcimin e sigurisë.

Ministri Puente deklaroi të premten se një defekt kompjuterik kishte nxjerrë jashtë funksionit sistemin e sinjalizimit hekurudhor. Ai e cilësoi si “të pashpjegueshëm” vendimin e mëvonshëm të qendrës së kontrollit për të lejuar trenin të vazhdonte udhëtimin.

Sipas vlerësimeve paraprake të hetuesve, në momentin e përplasjes treni po lëvizte me një shpejtësi prej 160 deri në 200 kilometrash në orë.

Top Channel