Pesë persona janë arrestuar në Greqi në kuadër të një operacioni kundër një grupi kriminal, i cili dyshohet se përdorte zjarrvëniet e qëllimshme, shpërthimet me granata dhe kërcënimet për të shantazhuar pronarë biznesesh dhe për t’u marrë para.
Sipas mediave greke, në krye të organizatës dyshohet se qëndronte shtetasi shqiptar Klodian Lekocaj alias Klod Cara, i cili ndodhet i burgosur në burgun e Trikalas. Hetuesit dyshojnë se ai vijonte të drejtonte aktivitetin kriminal edhe nga qelia, duke komunikuar me bashkëpunëtorët që vepronin jashtë ambienteve të burgut.
Hetimet kanë zbuluar një sërë sulmesh me granata ndaj bizneseve në Athinë. Një prej rasteve është regjistruar më 8 shtator 2026, kur dy lokale në qendër të kryeqytetit grek u vunë në shënjestër të sulmeve me granata.
Një tjetër episod ka ndodhur më 5 tetor, jashtë lokalit të njohur si “Paris”, ku u hodh një granatë, e cila fatmirësisht nuk shpërtheu. Në momentin e ngjarjes, brenda ambientit ndodheshin tetë klientë.
Sipas hetuesve, sulmet dyshohet se kishin si qëllim frikësimin e pronarëve të bizneseve dhe detyrimin e tyre për të paguar shuma parash.
Në kuadër të hetimeve janë arrestuar pesë persona, ndërsa në dosjen e çështjes përfshihen edhe katër të tjerë që ndodhen në burgjet greke.
Autoritetet po vijojnë hetimet për të dokumentuar plotësisht aktivitetin e grupit kriminal, rolin e secilit prej të dyshuarve dhe mënyrën se si organizatori i dyshuar arrinte të koordinonte veprimet nga burgu.
