Dy fluturime drejt Varshavës u përballën të martën me kërcënime për bomba, duke aktivizuar procedurat e sigurisë në aeroportet polake. Një avion i kompanisë LOT Polish Airlines, i nisur nga Londra, u detyrua të devijonte drejt aeroportit Modlin, pranë kryeqytetit polak. Në bord ndodheshin 181 persona.
Sipas një njoftimi të aeroportit Modlin, alarmi për bombë u mor në orën 09:54 me orën lokale. Boeing 737 MAX, që kryente fluturimin LO286 nga aeroporti Heathrow i Londrës drejt aeroportit Chopin të Varshavës, u ul vetëm shtatë minuta më vonë, në orën 10:01, sipas Ynet.
Avioni u vendos në një zonë të izoluar për kontrolle. Aeroporti Modlin u mbyll përkohësisht, por më pas rifilloi operimet, ndërsa zona ku ishte parkuar avioni vijoi të kontrollohej. Deri në momentin e raportimit nuk ishin publikuar rezultatet zyrtare të kontrolleve.
Një tjetër kërcënim për bombë u raportua po të martën, këtë herë ndaj një avioni të kompanisë Scandinavian Airlines (SAS), që fluturonte nga Kopenhaga drejt Varshavës. Avioni u ul në aeroportin Chopin, ku autoritetet nisën verifikimet, ndërsa aktiviteti i aeroportit vijoi normalisht.
Këto incidente ndodhën vetëm një ditë pas devijimit të një avioni të kompanisë Wizz Air, që udhëtonte nga Londra drejt Sofjes. Avioni u detyrua të ulej në Budapest pas një kërcënimi për bombë, ndërsa një avion luftarak i Forcave Ajrore hungareze u ngrit për ta shoqëruar. Pas kontrolleve nuk u gjet asnjë pajisje shpërthyese dhe alarmi u cilësua i rremë.
Ngjarje të ngjashme janë regjistruar edhe gjatë muajit të kaluar në fluturime drejt dhe nga Izraeli. Më 18 tetor, një avion i Austrian Airlines që udhëtonte nga Tel Avivi drejt Vjenës u devijua për në Sofje pas një kërcënimi për bombë.
Pesë ditë më parë, pasagjerët e një fluturimi të Delta Air Lines, që kishte mbërritur në aeroportin Ben Gurion nga Nju Jorku, u evakuuan pas një mesazhi anonim për praninë e një bombe në bord.
Po atë ditë, një tjetër fluturim i Delta-s nga Nju Jorku drejt Tel Avivit u vonua për shkak të një kërcënimi të ngjashëm. Në asnjërin prej këtyre rasteve nuk u gjetën mjete shpërthyese.
Zyrtarë të lartë të industrisë së aviacionit theksojnë se çdo kërcënim për bombë në një avion duhet të trajtohet me seriozitet, edhe kur paralajmërimi vjen në mënyrë anonime.
Masat varen nga burimi i informacionit, vendndodhja e avionit dhe faza e fluturimit kur merret kërcënimi. Në varësi të rrethanave, autoritetet mund të vendosin devijimin e itinerarit, uljen në një aeroport alternativ ose izolimin e avionit për kontrolle të posaçme.
