Panairi i 29-të i Librit shtyhet për në dhjetor, organizatorët: Situata e tensionuar në Tiranë rrezikon pjesëmarrjen e vizitorëve

Panairi i 29-të i Librit “Tirana 2026” nuk do të zhvillohet në datat 11-15 nëntor, siç ishte parashikuar fillimisht. Shoqata e Botuesve dhe grupi organizator kanë njoftuar këtë të martë shtyrjen e aktivitetit për në muajin dhjetor.

Në njoftimin e tyre, organizatorët bëjnë të ditur se vendimi është marrë pas konsultimeve me botues, pedagogë, mësues dhe lexues, duke argumentuar se situata e tensionuar në Tiranë nuk do të garantonte pjesëmarrjen e pritshme të vizitorëve.

Shqetësimi kryesor, sipas organizatorëve, lidhet me praninë e të rinjve dhe fëmijëve, të cilët përbëjnë një nga grupet kryesore të synuara të këtij panairi.

“Për shkak të situatës së tensionuar dhe shqetësuese në Tiranë, nuk do të garantonte pjesëmarrjen e duhur të vizitorëve dhe lexuesve, veçanërisht të të rinjve dhe fëmijëve”, thuhet në njoftim.

Panairi do të mbahet brenda muajit dhjetor, ndërsa datat e reja do të bëhen publike në ditët në vijim.

Shtyrja vjen në një periudhë tensionesh dhe protestash të vazhdueshme në kryeqytet, të cilat kanë ndikuar edhe në zhvillimin e aktiviteteve publike.

Njoftimi i plotë:

Të dashur kolegë botues dhe ekspozues të Panairit të 29 të Librit “Tirana 2026”,

Të nderuar lexues,

Grupi organizator i Panairit, pas këshillimeve me shumë botues, pedagogë, mësues dhe lexues, vlerëson se organizimi i tij në datat e parashikuara (11-15 nëntor 2026), për shkak të situatës së tensionuar dhe shqetësuese në Tiranë, nuk do të garantonte pjesëmarrjen e duhur të vizitorëve dhe lexuesve, veçanërisht të të rinjve dhe fëmijëve, të cilët përbëjnë një nga grupet kryesore të synuara të Panairit të Librit.

Ju njoftojmë se Panairi i 29 i Librit “Tirana 2026” do të zhvillohet gjatë muajit dhjetor, pra brenda këtij viti.

Datat e sakta do t’jua bëjmë të ditura shumë shpejt.

Duke ju falënderuar për mirëkuptimin dhe durimin, ju urojmë punë të mbarë!