Një goditje me shuplakë në mes të rrugës i ka shkaktuar një gruaje në Turqi humbjen e dëgjimit në veshin e majtë. Për ngjarjen, e regjistruar në qytetin e Nevşehirit, është arrestuar një 38-vjeçar, i identifikuar si Tolga Çelik.
Sulmi ndodhi në lagjen Kapucubaşı, jashtë një supermarketi. Sipas të dhënave të bëra publike, Çelik iu afrua nga pas gruas me inicialet S.E. dhe e goditi papritur në vesh. Momenti i incidentit u fiksua nga kamerat e sigurisë së zonës.
Pas ngjarjes, gruaja iu drejtua policisë dhe bëri kallëzim ndaj 38-vjeçarit. Gjatë marrjes në pyetje, ai mohoi se e kishte goditur qëllimisht, duke pretenduar se bëhej fjalë për një kontakt aksidental dhe se krahu i tij e kishte prekur pa dashje.
Megjithatë, ekzaminimet mjekësore zbuluan se gruaja kishte humbur dëgjimin në veshin e majtë. Sipas raportit mjekësor, dëmtimi nuk mund të trajtohej me një ndërhyrje të thjeshtë, por nuk përbënte rrezik për jetën.
Pas përfundimit të hetimeve, policia ia referoi çështjen gjykatës, e cila vendosi arrestimin e 38-vjeçarit. Ai u dërgua në burg, ndërsa pamjet e kamerave të sigurisë dokumentojnë momentin e goditjes.