Samiti i ardhshëm i NATO-s do të mbahet në Tiranë. Konfirmimi u bë gjatë takimit që kryeministri Edi Rama zhvilloi këtë të martë në Bruksel me Sekretarin e Përgjithshëm të Aleancës, Mark Rutte, ku në fokus ishin siguria euroatlantike, kërcënimet e reja dhe roli i Shqipërisë në planet strategjike të NATO-s.
Sipas njoftimit zyrtar, dy zyrtarët diskutuan për sfidat e sigurisë dhe nevojën për forcimin e bashkëpunimit mes vendeve aleate. Një vëmendje e veçantë iu kushtua kërcënimeve hibride, si sulmet kibernetike, dezinformimi, ndërhyrjet e huaja dhe mbrojtja e infrastrukturës kritike, të cilat kërkojnë një koordinim më të madh mes anëtarëve të Aleancës.
Një tjetër temë e rëndësishme ishte zhvillimi i Korridorit VIII si një korridor për mobilitetin ushtarak, që lidh Adriatikun me Detin e Zi. Ky projekt konsiderohet me rëndësi për lëvizjen e forcave dhe pajisjeve ushtarake, gatishmërinë operacionale dhe sigurinë e krahut juglindor të NATO-s.
Në këtë kuadër, gjatë takimit u diskutua edhe projekti i Porto Romanos, për të cilin u theksua rëndësia e zhvillimit të kapaciteteve infrastrukturore dhe logjistike në funksion të nevojave strategjike të Aleancës.
Çështja kryesore e takimit ishte gjithashtu organizimi i Samitit të NATO-s në Tiranë, i cili u rikonfirmua në vijim të vendimit të marrë më herët nga vendet anëtare. Për Shqipërinë, pritja e forumit më të lartë politik të Aleancës përbën një moment të rëndësishëm në marrëdhëniet e saj me partnerët euroatlantikë.
Samiti pritet ta vendosë Shqipërinë dhe Ballkanin Perëndimor në qendër të diskutimeve për sigurinë kolektive, në një periudhë të karakterizuar nga tensione dhe pasiguri gjeopolitike.
Gjatë takimit me Rutte, Rama rikonfirmoi angazhimin e Shqipërisë për përmbushjen e detyrimeve si vend anëtar dhe për forcimin e partneritetit transatlantik.