Chris Pappas fiton në New Hampshire, bëhet senatori i parë greko-amerikan pas 14 vitesh dhe burri i parë homoseksual në Senatin amerikan

Fitorja e tij ka rëndësi historike për komunitetin greko-amerikan, pasi rikthen përfaqësimin e këtij komuniteti në Senatin amerikan pas një mungese prej 14 vitesh. Pappas shënon gjithashtu një tjetër moment historik, pasi bëhet burri i parë homoseksual që zgjidhet senator në historinë e Shteteve të Bashkuara.

46-vjeçari, i cili ka shërbyer për katër mandate në Dhomën e Përfaqësuesve, do të zëvendësojë në Senat demokratën Jeanne Shaheen, e cila kishte vendosur të mos kandidonte më pas 18 vitesh në këtë detyrë.

Fitorja e tij rikthen kujtimin e dy senatorëve me origjinë greke që përfaqësuan komunitetin në të kaluarën: republikanes Olympia Snowe, e cila shërbeu në Senat nga viti 1995 deri në vitin 2013, dhe demokratit Paul Sarbanes, senator për 30 vite, nga viti 1977 deri në vitin 2007.

Chris Pappas vjen nga një familje emigrantësh grekë, me origjinë nga fshati Livadi, në zonën e Elassonës në Greqi. Ai ka lindur më 4 qershor 1980 në Manchester të New Hampshire, ku jeton me bashkëshortin e tij, Van Bentley.

Familja e tij zotëron restorantin historik “Puritan Backroom”, një biznes familjar me më shumë se një shekull histori në Manchester. Pappas ka punuar në këtë restorant që në moshë të re, përpara se t’i përkushtohej politikës.

Ai ka deklaruar vazhdimisht se është krenar për origjinën e tij greke dhe për lidhjet historike e kulturore mes Greqisë dhe Shteteve të Bashkuara. Gjithashtu, ka marrë pjesë në mënyrë aktive në veprimtaritë e komunitetit greko-amerikan dhe të Kishës Ortodokse Greke në SHBA.

Gjatë karrierës së tij në Kongres, Pappas është angazhuar edhe për çështje që lidhen me interesat e Greqisë dhe Qipros. Ai ka qenë bashkëkryetar i Grupit Helenik në Dhomën e Përfaqësuesve, së bashku me republikanin Gus Bilirakis.

Në këtë kuadër, ai ka mbështetur nisma për forcimin e bashkëpunimit ushtarak mes SHBA-së dhe Greqisë, përfshirë një projektligj që parashikonte zgjatjen me pesë vite të ndihmës amerikane për Greqinë përmes programit të Edukimit dhe Trajnimit Ushtarak Ndërkombëtar (IMET).

Në shtator të vitit 2025, Pappas ishte gjithashtu pjesë e një nisme dypartiake që kundërshtonte shitjen e mundshme të avionëve luftarakë F-16 dhe F-35 Turqisë. Në mars të vitit 2026, ai dënoi edhe vendosjen e avionëve luftarakë turq F-16 në pjesën e pushtuar të Qipros.

Pappas hyri në politikë në një moshë të re. Në moshën 22-vjeçare, ai u zgjodh anëtar i Dhomës së Përfaqësuesve të New Hampshire, përpara se të merrte pjesë në disa struktura të tjera të administratës lokale dhe shtetërore.

Në vitin 2018, ai fitoi për herë të parë një vend në Dhomën Federale të Përfaqësuesve, duke përfaqësuar distriktin e parë të New Hampshire. Më pas u rizgjodh edhe në tri zgjedhje të tjera radhazi, në vitet 2020, 2022 dhe 2024.

Në prill të vitit 2025, ai njoftoi kandidaturën për Senat, pas vendimit të demokrates Jeanne Shaheen për të mos kërkuar një mandat tjetër.

“Po kandidoj për Senat sepse ekonomia jonë, demokracia dhe mënyra jonë e jetesës janë në rrezik. New Hampshire meriton një senator që ka lidhje të forta me njerëzit, vendet dhe vlerat e këtij shteti”, deklaroi ai në momentin e shpalljes së kandidaturës.

Rruga drejt Senatit nuk ishte pa përplasje, veçanërisht brenda vetë Partisë Demokratike. Pappas përfaqëson krahun më të moderuar të partisë, ndërsa kundërshtarja e tij në zgjedhjet paraprake, Karisma Manzur, mbështetej në një platformë më progresiste.

Pappas fitoi bindshëm zgjedhjet paraprake të 8 shtatorit, duke marrë 64.6% të votave, kundrejt 33.2% të Manzur.

Gjatë fushatës, ai u përball edhe me kritika nga figura të krahut të majtë të demokratëve, mes tyre senatori Bernie Sanders dhe kongresmenja Alexandria Ocasio-Cortez, për mbështetjen financiare që kishte marrë nga organizata pro-Izraelit.

Sipas të dhënave të Komisionit Federal të Zgjedhjeve, të cituara nga “New Hampshire Journal”, Pappas kishte përfituar rreth 689 mijë dollarë në kontribute të drejtpërdrejta dhe të orientuara nga AIPAC dhe organizatat e lidhura me të.

Në garën për Senat, përballë tij ishte republikani John Sununu, ish-senator i cili kishte mbajtur këtë post nga viti 2003 deri në vitin 2009. Ai vinte gjithashtu nga një familje me traditë të gjatë politike në New Hampshire dhe kishte mbështetjen e presidentit Donald Trump.

Trump u angazhua personalisht në fushatë, duke shprehur mbështetjen për Sununu dhe duke e konsideruar New Hampshire një mundësi për republikanët për të rifituar një vend në Senat.

Megjithatë, Pappas e përqendroi fushatën te kostoja e jetesës, mbrojtja e kujdesit shëndetësor, arsimi publik dhe Sigurimet Shoqërore. Ai kritikoi gjithashtu politikat e administratës Trump për tarifat tregtare dhe ndërhyrjet ushtarake jashtë vendit.

Në debatin e fundit televiziv, më 28 tetor, dy kandidatët u përplasën për ekonominë, politikën e jashtme, taksat dhe sistemin e pensioneve. Pappas akuzoi Sununu se mbështeste politikat e Trumpit, ndërsa republikani vuri në pikëpyetje rezultatet e punës së demokratit gjatë tetë viteve në Kongres.

Pas shpalljes së rezultateve, Pappas iu drejtua mbështetësve të tij, duke e cilësuar fitoren si një moment të rëndësishëm për të ardhmen e shtetit dhe të vendit.

“Lufta që nisëm në këtë sallë dhe e çuam në çdo cep të New Hampshire tani zhvendoset në Uashington, për ta rikthyer shtetin dhe vendin tonë në rrugën e duhur”, deklaroi ai.

Pappas kritikoi gjithashtu interesat e mëdha ekonomike dhe politikat e administratës Trump, duke u zotuar se në Senat do të punojë për ndryshimin e kursit politik.

Fitorja e tij shënon kështu jo vetëm një moment të rëndësishëm për karrierën e tij politike, por edhe një zhvillim historik për komunitetin greko-amerikan, i cili rikthehet pas 14 vitesh me një përfaqësues në Senatin e Shteteve të Bashkuara.

Top Channel