Buxheti në Komision/ PD ikën nga mbledhja: Diskutim vetëm për akuzat e Veliajt dhe dhunën ndaj protestuesve! Aktin për gjobat e çojmë në Kushtetuese (VIDEO)

Ministri i Drejtësisë, Toni Gogu, nuk u paraqit në Komisionin për të Drejtat e Njeriut, ku do të diskutohej buxheti i vitit 2027, duke shkaktuar debate mes opozitës dhe mazhorancës. Jorida Tabaku solli në vëmendje pretendimet e kryebashkiakut të Tiranës Erion Veliaj, për arsyet e transferimit të tij në burgun e Fierit, ndërsa akuzoi qeverinë, dhe për shkelje të të drejtave të njeriut gjatë protestave. Dy deputetet demokrate, Jorida Tabaku dhe Gerta Bardeli braktisën mbledhjen me argumentin se nuk ka kuptim të flitet për buxhetin, kur Shqipëria, sipas tyre, po përballet me shkelje të vazhdueshme të të drejtave të njeriut.

***

Prania e ministrit të Drejtësisë në Komision, ishte pritur me një vëmendje të veçantë. Jo aq për diskutimet mbi buxhetin. Për opozitën do të ishte një shans i mirë për të mbajtur gjallë konfliktin e ashpër në gjirin e shumicës, mes kryebashkiakut në paraburgim, Erion Veliaj dhe kryeministrit Edi Rama.

Në orët e vona të së premtes së kaluar, ministri Gogu kishte vizituar Veliajn në burgun e Fierit. Kryebashkiaku ka deklaruar se ishte transferuar në mënyrë të beftë, e pa ndonjë shpjegim, ndërsa bisedën me Gogun e ka përshkruar si të ngarkuar me mesazhe kërcënuese, që sipas tij, ministri i kishte transmetuar në emër të Ramës.

Ndërsa Gogu mungoi, kryetarja e Komisionit Jorida Tabaku tha se rasti nuk mund të kalonte në heshtje. Ajo bëri të qartë se personalisht nuk kishte keqardhje për Veliajn.

"Por që të shkojë Ministri i Drejtësisë dhe të kërcënojë, ndërkohë që ne të mos kemi informacion, për mua është një kambanë alarmi. Dhe, kolegë, ne kemi nisur vizita në burgje, kemi parë kushtet, por sot është momenti që të kemi transparencë për atë që ka ndodhur. Kur kjo i ndodh Erion Veliajt, po çfarë u bëni ju kundërshtarëve?", tha Tabaku. 

Në mbrojtje të Gogut, doli deputeti socialist i Fierit, Ramion Kurti

"Ministri i Drejtësisë i ka dhënë shpjegimet e veta në një postim në Facebook dhe nuk e kuptoj pse duhet të vijë në komision për të bërë politikën tuaj ditore", u shpreh ai. 

Por nuk ishte vetëm kjo çështje që ushqeu debatet. Tabaku, preku dhe temën e protestave të fundit, duke thënë se Partia Demokratike do ta çojë në Gjykatën Kushtetuese aktin normativ për tubimet, që parashikon gjoba nga 5 mijë deri në 500 mijë lekë për aktet e dhunës gjatë protestave. 

Jorida Tabaku: Qytetarët kanë nisur të merren peng në rrugët e Tiranës. Me makina police, pa identitet, pa policë të identifikuar si të tillë, qytetarët kanë nisur të gjobiten. Ky Kuvend ka nevojë te marrë masa, të thërrasim ministrat e brendshëm dhe të drejtësisë, për të diskutuar. Se për herë të parë është vënë në pikëpyetje  e drejta kushtetuese dhe janë kërcënuar të drejtat e njeriut. Mos të sillemi sikur kuvendi është jashtë një realiteti politik.

Tabaku akuzoi policinë për dhunë ndaj protestuesve dhe ngriti shqetësimin për shoqërimet e të miturve. Sipas saj, rreth 1 mijë persona janë arrestuar dhe shoqëruar në komisariate, mes tyre 250 të mitur. Por Iris Luarasi tha se sipas shifrave të ministrisë së Brendshme bëhet fjalë vetëm për 328 arrestime dhe akuzoi PD për qëndrim të njëanshëm. 

“Çfarë vendi jemi ne ku pjesëmarrja në protestë vjen me gjobë? Nuk e di nëse ndodh në një vend me demokraci normale. Merresh dhe rrëmbehesh në mes të protestës”, tha Tabaku.

Deputeti socialist Ramion Kurti tha se e drejta për të protestuar nuk justifikon dhunën ndaj institucioneve, duke i kujtuar opozitës se si selia e PD u kthye strehë për protestuesit e pajisur me molotovë të cilët sulmonin policinë.

Ramion Kurti: Të rinjtë kanë të drejtë të protestojnë, por jo të dhunojnë institucionet. Skam parë që opozita të ketë dënuar dhunën. Selia e PD  është kthyer në magazinë molotovi. S’keni folur për policët e dhunuar, keni fol vetëm për protestues të dhunuar. Sa për pjesën e të drejtave që protestuesit kanë, askush nuk i ka mohuar të drejtat. Kryeministri çdo ditë u bën thirrje për dialog.

Jorida Tabaku: Unë kam dalë dhe kam dënuar dhunën, para se ta dënonit ju, se kam respekt për shtetin ligjor, dhuna e policisë që unë kam konstatuar vetë me të rinj minorenë në paraburgim. Që iu është thyer kafka, kam qenë nga mëngjesi në darkë te trauma dhe nëpër paraburgime. Flas me dhunë të parë dhe identifikuar nga unë.

Në kundërpërgjigje Jorida Tabaku i kujtoi socialistëve personat me shkopinj që u shfaqën brenda selisë së PS, kur u sulmua nga protestuesit.

Jorida Tabaku: Nuk fola për seli partish. Nëse do flasim, edhe për ato huliganët që dolën për të mbrojtur PS. Po flas për atë dhunë që është ushtruar nga institucione. S’ka gjë më normale të vijë të raportojë këtu ministri, përkundrazi, të vijë të raportojë të flasë dhe nëse ne kemi perceptim të gabuar të vijë të na e sqarojë.

Iris Luarasi: Nga PD nuk kemi parë një prononcim serioz për dhunën ndaj policisë. Kemi parë nga mazhoranca njerëz që kanë dënuar dhunën jo proporcionale që mund të ketë ndodhur të rinjve dhe të miturve. S’kam dëgjuar të flitet për përdorimin e të miturve në protesta. Sepse ai nuk është vendi ku ata duhet të jenë. Këto janë disa nga gjërat që duhet të themi. Huliganët i kemi pare, se aty fshihen ata që gjëmohen nga polici. Po përdor të njëjtat fjalë që përdoret edhe ju. Nuk i takon këtij komisioni që të shkojë me këtë lloj gjuhe.

Në debat u përfshi edhe deputeti socialist Ardit Bido, i cili i kujtoi opozitës masakrën e 21 Janarit, duke thënë se sot policët që ushtrojnë dhunë joproporcionale ndaj protestuesve nuk merren në mbrojtje, por pezullohen nga detyra.

TAG:
• masat ndaj dhunuesve
• protestat kunder qeverise
• Komisioni për të Drejtat e Njeriut dhe Mjetet e Informimit
• Jorida Tabaku
• lufta veliaj rama
• iris luarasi
• Ramion Kurti
• ardit bido