Dyshohej se u sulmua për vdekje nga ariu, ekspertiza zbulon plagë nga armë zjarri në trupin e 61-vjeçarit

Ngjarja e rëndë e raportuar një ditë më parë në Bulqizë, ku një 61-vjeçar dyshohej se kishte humbur jetën pas sulmit nga një ari, ka marrë një tjetër drejtim pas ekzaminimit mjekoligjor.

Viktima, Urim Fiku, dyshohet se është qëlluar me armë zjarri, pasi ekspertiza mjekoligjore ka konstatuar plagë në pjesën e kraharorit të shkaktuara nga arma e zjarrit.

Sipas të dhënave paraprake, 61-vjeçari kishte dalë në mal për të kullotur dhitë dhe ishte kthyer në banesë i plagosur. Familjarët e kishin dërguar në spital, duke pretenduar se ishte sulmuar nga një kafshë e egër, dyshohet ari.

Rasti ishte referuar në polici nga Spitali i Bulqizës, ndërsa zbulimi i plagëve të armës së zjarrit ka ndryshuar pistën e hetimeve.

Njoftimi i policisë

Në vijim të informacionit paraprak të dhënë për ngjarjen e ndodhur në Bulqizë, ku shtetasi U. F., 61 vjeç, dyshohej se kishte humbur jetën si pasojë e sulmit nga një kafshë e egër (ari), bëjmë me dije se:

Nga hetimet e kryera deri në këto momente nga grupi hetimor, nën drejtimin e Prokurorisë, dyshohet se 61-vjeçari përveç dëmtimeve të dyshuara se janë të shkaktuara nga kafsha e egër,  është konstatuar një plagë e shkaktuar me armë zjarri.

Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes dhe dokumentimin ligjor të saj.