Qytetarët që kanë llogari pagese në ALTA Banka AD Bitola, por nuk disponojnë kartela pagese, do të mund të tërheqin para në sportelet e degës kryesore të bankës në Manastir duke nisur nga e enjtja, 5 nëntor 2026, njoftoi Banka Popullore.
Për këtë qëllim, në degën që ndodhet në rrugën “Dobrivoje Radosavljeviç” nr. 21 në Manastir do të vihen në funksion disa sportele.
Të lidhura
None found
Shërbimi u drejtohet qytetarëve që marrin fonde në llogaritë e tyre pa pasur kartelë pagese, veçanërisht pensionistëve dhe përfituesve të ndihmës sociale. Shuma që mund të tërhiqet është deri në 20,000 denarë, kufiri maksimal i lejuar për një periudhë dyjavore.
Prej 6 nëntorit, përfshirë edhe të shtunën, 7 nëntor, dega do të punojë me dy ndërrime për t’u shërbyer sa më shumë klientëve. Tërheqjet do të zhvillohen gjatë disa ditëve sipas një orari; secili qytetar do të marrë me SMS njoftimin për ditën dhe orën kur duhet të paraqitet në filial.
Banka Popullore u kërkon qytetarëve të respektojnë terminin e caktuar dhe të mos shkojnë në filial në ditë të tjera apo përpara orës së njoftuar, në mënyrë që të shmangen grumbullimet dhe pritjet e gjata. Për personat që nuk mund të paraqiten në orarin e tyre do të caktohen termine shtesë.
Në këto sportele do të kryhen vetëm tërheqje parash, jo transaksione të tjera. Banka Popullore bëri të ditur gjithashtu se po përgatitet hapja e sporteleve për pensionistët dhe përfituesit e ndihmës sociale edhe në qytete të tjera të vendit, për të cilat do të japë njoftim së shpejti.
